[center][/center]
Bakı Slavyan Universitetində (BSU) gərginlik səngimir. Universitet daxilindən redaksiyamıza daxil olmuş məlumata görə Anar Nağıyevin rektor təyin olunduğu gündən bu yana ali təhsil ocağında sağlam akademik mühitdən çox, daxili çəkişmələr, idarəetmə böhranı və narazılıqlar hökm sürür.
Son illər Azərbaycanda bir sıra universitetlər elm, təhsil, araşdırma, H-indeks və beynəlxalq QS reytinqləri üzrə irəliləyiş əldə etdiyi halda, BSU-nun “uğuru” yalnız UI GreenMetric siyahısında qeydə alınıb. O da nə az, nə çox — İnfrastruktur (SI) – 515 xal, Tullantıların idarəolunması (WS) – 1125 xal
Görəsən hansı infrastrukturdan söhbət gedir-Yarımçıq qalmış təmirdən, yoxsa mağaranı xatırladan auditoriyalardan?
BSU-nun qocaman kollektivi bu sualın cavabını yaxşı bilir…
Adının çəkilməsini istəməyən uzunillik BSU əməkdaşı bildirir ki, universitetin institusional akkreditasiyadan keçə bilməməsinin əsas səbəbi rektorun yanlış qərarları və səriştəsiz “komandasıdır”.Onun sözlərinə görə, bu idarəçilik universiteti sözün əsl mənasında bataqlığa sürükləyib.Rektorluq dövründə atılan ən mübahisəli addımlardan biri də sabiq rektor Kamal Abdullanın böyük zəhmətlə yaratdığı BSU nəzdindəki Məktəb–Lisey Kompleksinin universitetin tabeliyindən çıxarılması olub. Nəticədə bu təhsil ocağı Bakı Şəhəri Təhsil İdarəsinin balansına verilib.
Sual yaranır: BSU bu qərardan nə qazandı?
Cavab sadədir: Heç nə. Yalnız itki.
Slavyanşünaslıqdan “yolayrıcı”
Mediatv.az-a verilən məlumata görə, rektorun şəxsi istəyi ilə universitetdə fəaliyyət göstərən bir sıra dil və mədəniyyət mərkəzləri bağlanıb. Bu isə BSU-nun əsas missiyasına zidd olaraq, ali məktəbin tədricən Slavyanşünaslıqdan uzaqlaşdırılması kimi dəyərləndirilir. Universitetin hansı istiqamətə getdiyi isə hələ də müəmmalıdır.
1.8 milyon manatlıq “itən təmir”
Ötən il BSU-nun təmirinə 1,8 milyon manat vəsait ayrılıb. Lakin nəticə göz qabağındadır.Universitet binalarının cəmi iki mərtəbəsi natamam şəkildə təmir olunub.Bəs qalan vəsait hara xərclənib,niyə bu prosesə nəzarət edilmir?
Son günlər mediada yayılan məlumatlar isə vəziyyəti daha da qalmaqallı edir. Bildirilir ki, rektor təhsil və elmi problemləri bir kənara qoyaraq, "şəxsi baxımı" ilə gündəmə gəlir. Universitetin professor-müəllim heyəti faktiki olaraq diplomsuz və səriştəsiz bir “komandanın” ümidinə buraxılıb. Rektor isə təcrübəli kadrları dəstəkləmək əvəzinə, onları "sındırmaq" və dəyərsizləşdirməklə məşğuldur. Məlumata görə, universitetə aid olmayan şəkildə yaradılmış Rektorun Katibliyinə rektorun katibəsi rəhbər təyin olunub və ona limitsiz səlahiyyətlər verilib. Lakin bu səlahiyyətlərin necə və hansı etik çərçivədə icra olunacağı öyrədilməyib.Bir sözlə universitet diplomsuz, üzə durmaqla məşğul olan və bunun müqabilində daha çox maaş alan komandanın ümidinə qalıb.Hər həftə universitet əməkdaşlarına rektorun reklamı ilə bağlı statusların paylaşılması barədə göstərişlər verilməsi isə ümumi narazılığı pik həddə çatdırıb.BSU-nun qocaman və nüfuzlu kollektivi hesab edir ki, universitetin son illərdə bu qədər dəyərdən düşməsi məhz Anar Nağıyev və onun komandasının idarəçilik xəttinin nəticəsidir.
“BSU kollektivi Elm və Təhsil Naziri Emin Əmrullayevə müraciət edərək, ötən il işdən azad edilən yarıtmaz kadrların siyahısına BSU rektorunun da daxil edilməsini, eləcə də rektorun hazırda tutduğu vəzifənin sonuncu təyinat ili olduğunu nəzərə alaraq, yol verdiyi bu kimi halların onun növbəti 5 illik müqaviləsinin uzadılmaması ilə nəticələnməsini tələb edir. Daxil olmuş məlumata görə kollektiv hesab edir ki, rektorun bu kimi hərəkətləri Elm və Təhsil Naziri Emin Əmrullayevin adına yalnız kölgə salır. Çarəsiz vəziyyətə düşən universitet kollektivi göydə ulu Tanrıya, yerdə isə ədalətin bərqərar olunacağına ümid edərək Emin Əmrullayevə pənah gətirir.
Ən maraqlısı isə budur ki, rektor tez-tez iclaslarda özünü nazirin “əsas kadrı” kimi təqdim edir, onun adından tapşırıqlar verdiyi bildirilir.
O zaman sual yaranır,əgər elədirsə niyə BSU akkreditasiyadan keçə bilmədi, niyə məktəb-lisey universitetin əlindən alındı, milyonlar hara xərcləndi?
Daxil olmuş məlumatda qeyd olunur ki, maliyyə işləri üzrə prorektor Elçin Hüseynov isə öz vəzifə funksiyalarını bir kənara qoyaraq, faktiki olaraq “rektorun şəxsi qovluq daşıyanı” rolunda çıxış edir.Suallar çoxdur. Cavab isə yoxdur. Görünən odur ki, rektor bu suallara aydınlıq gətirmək əvəzinə və şəxsi reklamı ilə məşğuldur.
Əgər rektor öz reklamına xərclədiyi yüz minlərlə manatı kollektivin maaşına və təhsilin inkişafına yönəltsəydi, bəlkə də bu gün BSU tamam başqa bir səviyyədə olardı…
Mediatv.az