Tovuz rayon Qovlar kənd sakinləri olan Hüseynovlar ailəsi bəlkədə Azərbaycanın kriminal hadisələr statistikasında ölkədə ən böyük soyğuna məruz qalan insanlardır.
Adamların başına gələnlər film formatında ssnerailəşdirilib lentə alınsa bunun ən həyəcanverici və dramatik soyğun filmlərindən biri olacağına əminəm. Ailə bir neçə il bundan əvvəl həbsə düşən övladlarının hüquqlarını qorumaq üçün Sevil Hacıyeva adlı bir xanım vəkillə tanış olurlar. Hüquqi prosedurların başlanması üçün Hüseynovlar ailəsi bu vəkillə müqavilə bağlayaraq onun hesabına pul köçürməyə başlayır. Tanışlığın ilk dönəmlərində ölkənin hüquq-mühafizə və məhkəmə sistemində yüksək postlarda çalışan vəzifəli şəxslərlə yaxın əlaqələrinin olduğunu göstərərək özünü nüfuzlu vəkil kimi imitasiya edib ailənin böyük etibarını və etimadını qazanan Sevil Hacıyevanın vəkillik statusu sonradan bu ailənin gəlini olacaq qədər dramatik nöqtələrə yüksəlir. Onun bu ailənin gəlini olmasını niyə dramatik ifadə ilə nəql etməyimizin səbəblərini isə daha sonra təfərrüatlı anlayacaqsınız. Hüseynovlar ailəsinin övladlarına vəkillik edən Sevil Haciyeva qısa müddət ərzində ailənin 476 min manat vəsaitini və bütün mülklərini ələ keçirir.
Sevil Hacıyeva daha sonra Hüseynovlar ailəsinin həbsdə olan oğlu Rahib Hüseynovla elə həbsxanada nikah bağlayaraq yeni bir mərhələnin təməlini atır. Bu nikahın onun tez bir zamanda azadlığa çıxması üçün zərurət olduğunu əsas göstərən xanım vəkil Rahib Hüseynovun adında olan əmlakları ələ keçirməyə başlayır. Eyni zamanda Sevil Hacıyeva Hüseynovlar ailəsinin digər mülklərini – Bakı şəhərindəki mənzillər, fermer təsərrüfatı və bir neçə nəqliyyat vasitəsini onlara satdıraraq pullarını övladlarını azadlığa çıxartmaq üçün müxtəlif hüquq mühafizə və məhkəmə sistemində çalışan vəzifəli şəxslərə vermək adı ilə mənimsəyir.
Ətraflı
Bu qədər var dövlətlərinin, pullarının ələ keçirilməsindən sonra Məhkəmə Hüseynovlar ailəsinin hər iki övladının 9 il müddətində həbs edilməsi barədə qərar çıxarır. Amma Sevil Hacıyeva bu mərhələdə qərarın apelyasiya məhkəməsində ləğv ediləcəyini deyərək ailəni sakitləşdirməyə müəffəq olur. Və bu mərhələdə bacısı qızı Teymurova Seva İkram qızını Hüseynovlar ailəsinə Bakı Apelyasiya məhkəməsinin keçmiş sədri İman Nağiyevin köməkçisi kimi təqdim edərək yenidən onlardan külli miqdarda pul ələ keçirib. Appelyasiya məhkəməsi birinci instansiya məhkəməsinin mövcud həbs qərarını qüvvədə saxladıqdan sonra isə Hüseynovlar ailəsi bu müddət ərzində aldadıldıqlarını dərk edərək Baş Prokuror yanında Korrupsiyaya qarşı Mübarizə Baş İdarəsinə müraciət edir. Müraciət əsasında vəkil Sevil Hacıyeva barəsində AZ Res CM-nin 178.4-cü maddəsi ilə cinayət işi açılır. 2 ilə yaxın davam edən istintaq araşdırmalarından sonra Sevil Hacıyeva Hüseynovlar ailəsini bir neçə mənzili və aldığı pulun bir hissəsini geri qaytaracağına əmin edərək onları öz şikayət iddialarından geri çəkilməyə razı salır. Həmin razılıq 13 oktyabr 2023-cü il tarixində Bakı şəhəri 11 saylı notariat ofisində baş tutur. Tərəflər arasındakı bu rəsmi barışıqdan sonra Sevil Hacıyeva barəsində açılan cinayət işinin icrasına da xitam verilir. Amma anlaşıldığı kimi Vəkil Sevil Hacıyeva Hüseynovlar ailəsinə vədd etdiyi nə mənzilləri nə də vəsaiti geri qaytarmır.
Lətifə Hüseynovanın sözlərinə görə, vəkilləri olmuş Sevil Hacıyeva ailənin həbsdə olan, həmçinin onunla nikahda olan oğlu Rahib Hüseynovla görüşərək ona DTX-ya məsul vəzifəyə işə girmək ərəfəsində olduğunu əsas gətirərək nikahı sonlandırmaq zərurətinin yarandığını bildirir. Və beləliklə xanım vəkil Haciyeva Hüseynovlar ailəsi ilə arasında olan son bağlantısından da bu yolla qurtulmuş olur.
Hüseynovlar ailəsinin həbsdə olan iki oğlu həbs müddətlərinin bitməsinə 2 il qalmış ölkə başçısı tərəfindən imzalanan əfv sərəncamı ilə öz azadlıqlarına qovuşur. Övladlarını bu illər ərzində həbsdən azad etmək üçün ahıl ana-atanın çıxdığı bu dramatik yolun sonunda isə onların 476 min manat nəğd pulu, Bakı şəhərində yerləşən 3 mənzili, milyonlarla qiyməti olan fermer təsərrüfatları, 3 avtomobili, sahibkarlıq təsərrüfatının bütün texnikaları və torpaq sahələri əllərindən çıxır. Hazırda bir zamanlar böyük varidat sahibi olan İsmayılovlar ailəsi baxımsız bir mənzildə kirayə qalır. Hələ bütün bunlar azmış kimi İsmayıl Hüseynovla Sevil Hacıyevanın bacısı qızı olan Seva Teymurova arasında bağlanan borc müqailəsinə görə vəsaitin 70 faizi İsmayıl Hüseynovun əmək pensiyasından tutulur.
Araşdırmalarımız nəticəsində məlum oldu ki, bu xanım vəkil barəsində Xaçmaz RPŞ-nin istintaq bölməsində də cinayət işi açılıb, istintaq davam edir. O, 10 iyun 2023-cü il tarixində Xaçmaz rayonunun Gödəkli kəndi ərazisində yerləşən İmran Bahadırova məxsus bağ sahəsinə gedərək ona hücum edib və müxtəlif dərəcəli bədən xəsarətləri yetirib. Bənzər hadisə 2 ay sonra 8 avqust 2023-cü ildə də təkrar baş verib. Bu dəfə Sevil Hacıyeva yenidən həmin bağ sahəsinə gedərək İmamverdiyev İsmət Tahir oğluna hücum edib və həmin şəxsə də müxtəlif dərəcəli bədən xəsarətləri yetirib. Faktla əlaqədar olaraq AZ Res.CM-nin 128-ci maddəsi ilə cinayət işi açılıb. Barəsində cinayət işi davam edən Sevil Hacıyeva şahidlərə müxtəlif təzyiq və təkliflər edərək onları öz ifadələrini dəyişdirməyə təhrik edir.
Qeyd edək ki, sözügedən Sevil Hacıyeva bu müddət ərzində ölkəni tərk etməyə cəhd etsə də, polis əməkdaşları onun hava limanından çıxışını əngəlləyib. Xaçmaz RPŞ-də Sevil Hacıyeva barəsində başqa yerə getməmək haqqında qətimkan tədbiri seçilib. Amma istintaqın yekunlaşması ərəfəsində Xaçmaz rayon məhkəməsi rayon polis şöbəsinin bu qərarını ləğv edib.(7Times.az)