Bolnisi bələdiyyəsinin Naxiduri (Arıxlı) kəndində iki yeniyetmənin ölümünə səbəb olan sürücü prokurorluğun vəsatəti əsasında həbsdə saxlanılıb.

Moderator.az xəbər verir ki, azərbaycandilli 24News.ge bu barədə Gürcüstan Baş Prokurorluğuna istinadla məlumat yayıb.

Bildirilir ki, Daxili İşlər Nazirliyi tərəfindən aparılan araşdırmalarla müəyyən edilib ki, təqsirləndirilən şəxs dekabrın 30-da Bolnisi Bələdiyyəsi ərazisində avtomobili idarə edərkən ehtiyatsızlıq edib, nəqliyyat vasitəsinin təhlükəsizliyini təmin etməyib və nəticədə iki azyaşlını vurub. Prokurorluğun məlumatına görə, zərərçəkənlər aldıqları xəsarətlər nəticəsində yerindəcə keçinib.

Qeyd olunur ki, hüquq-mühafizə orqanlarının əməkdaşları təqsirləndirilən şəxsi elə həmin gün həbs ediblər. O, Cinayət Məcəlləsinin 276-cı maddəsinin 8-ci (avtomobilin təhlükəsizliyi və ya istismarı qaydalarını pozma, iki nəfərin ölümünə səbəb olma) ilə ittiham olunur.

Prokurorluğun vəsatəti əsasında məhkəmə təqsirləndirilən şəxs barəsində həbs qətimkan tədbiri seçib, araşdırmalar davam etdirilir.
Xatırladaq ki, musavat.com-un yazdığına görə, Gürcüstanın Bolnisi rayonunun Arıxlı kəndindəki hadisə zamanı iki gənc avtomobilin vurması nəticəsində həyatını itirib, bir neçə nəfər isə yaralanıb. "Qəzadan sonra vəziyyət daha da pisləşib, çünki sürücünün Azərbaycanlı əhalinin ünvanına təhqiramiz ifadələr işlətməsi kənddə qəzəb və etiraza səbəb olub.

Yerli əhali bildirib ki, qəzanı törədən sürücü Azərbaycanlı sakinləri təhqir edərək vəziyyəti daha da gərginləşdirib. Bu, kənd sakinlərinin etirazına səbəb olub və nəticədə kənddə gərginlik artıb. Hal-hazırda Arıxlı kəndində xüsusi təyinatlı polis qüvvələri yerləşdirilib.

Azərbaycanlı jurnalistə danışan kənd sakinləri baş verən hadisəni və etirazlarının səbəbini açıqlayıblar. Onlar qeyd edirlər ki, iki gəncin qanının yerdə qalmasını istəmirlər və ədalətin təmin olunmasını tələb edirlər. Kənd əhalisi həmçinin vurğulayıb ki, sürücünün təhqiramiz davranışı onların qəzəbini artırıb və bu səbəbdən də hadisəyə kəskin reaksiya göstəriblər..."