Sumqayıtda Torpaq Mənimsəməsi: Şəxsi Mülkiyyət Təhlükə Altındadır
[center]
[/center]
[/center]Sumqayıt şəhəri, 76-cı məhəllə ərazisində şəxsi mülkiyyətdə olan torpaq sahəsi qanunsuz olaraq zəbt edilmişdir. Beş nəfərə məxsus olan bu sahə 2025-ci ilin yanvar ayında, qeyri-iş günü və gecə saatlarında texnika yeridilərək işğal olunmuşdur. Sakinlərə məxsus hasarlar sökülmüş, tikinti materialları dağıdılmış və həmin gün ərazidə naməlum şəxslər qeyri-qanuni tikinti işlərinə başlamışdır.
Şikayətçilərin bildirdiyinə görə, əraziyə yaxınlaşdıqları zaman həmin şəxslər özlərini “əmr almış şirkət işçiləri” kimi təqdim etmişlər.
Hadisənin arxasındakı şirkət: “SENERGY.AZ.MMC”
Araşdırmalar nəticəsində məlum olmuşdur ki, işğalın arxasında duran şirkət “SENERGY.AZ.MMC”dir. Şirkətin rəhbəri Seymur Quliyevdir. Torpaq sahibləri ona müraciət edərək bildiriblər ki, müvafiq sənədlərə və 2013-cü ildə Sumqayıt Bələdiyyəsi tərəfindən verilmiş mülkiyyət aktına əsasən torpaq onlara məxsusdur. Lakin Seymur Quliyev bu iddialara qarşılıq olaraq “mən şəhid ailəsiyəm, başınıza oyun açaram” kimi təhdidlər səsləndirmişdir.
Təhdidlər və Qanunsuz Dəstək
Şikayətçilər bildirir ki, qarşı tərəfin aqressiv davranışlarına baxmayaraq, mülkiyyət sənədləri təqdim edilmiş, lakin tikinti işləri dayandırılmamışdır. Bir neçə dəfə “kimin gələcəyini gözləyin” deyə xəbərdarlıq edildikdən sonra əraziyə Sumqayıt Bələdiyyəsinin keçmiş sədri Orxan Adıgözəlzadə və memarlıq şöbəsinin əməkdaşı Araz Muradzadə gəlmiş və torpağın guya Seymur Quliyevə verildiyini bildirmişlər. Bu şəxslər Sumqayıt İcra Hakimiyyəti başçısı cənab Zakir Fərəcovun adından istifadə edərək şikayətçiləri geri çəkilməyə məcbur etməyə çalışıblar.
Hüquqi Addımlar və Saxta Sənədlər
Torpaq sahibləri məsələni hüquqi müstəviyə çıxarmış, aidiyyəti dövlət orqanlarına şikayətlər göndərmiş və Sumqayıt Şəhər İnzibati Məhkəməsinə müraciət etmişlər. Tikinti fəaliyyəti isə bu müddətdə davam etmiş və 35 sot sahə tam hasara alınmışdır. Qarşı tərəf özlərini “icarədar” kimi təqdim etsə də, təqdim olunan sənədin yalnız fotosu göstərilmiş, orijinalı gizlədilmişdir. Daha sonra əldə olunan nüsxənin saxta olduğu hüquqi ekspertiza ilə təsdiqlənmişdir.
Qanunvericiliyə əsasən, sənaye zonasına daxil olan bu cür torpaqlar yalnız Prezidentin fərmanı ilə yaradılmış hərrac komissiyası və müvafiq 5 nazirliyin razılığı ilə icarəyə verilə bilər. “SENERGY.AZ.MMC”nin təqdim etdiyi sənəd bu prosedurlardan keçməmişdir.
Qazilərdən Sui-istifadə
Hər dəfə etirazlar artdıqca, əraziyə qazilər gətirilərək onların adından istifadə edilmiş və bu, ictimai təpkini boğmaq üçün vasitəyə çevrilmişdir. Bu cəhdlər cəmiyyətin həssas təbəqələrinin adından sui-istifadə hallarıdır.
Dövlət Müdaxiləsi və Qismən Ədalət
Məsələ mediada ictimailəşdikdən sonra Əmlak Məsələləri Dövlət Komitəsi və Fövqəladə Hallar Nazirliyinin əməkdaşları əraziyə baxış keçirmiş, bir hissə hasarlar sökülmüş və tikinti dayandırılmışdır. Əmlak Komitəsi rəsmi məktubla Sumqayıt Bələdiyyəsinin verdiyi sənədlərdə hüquqi əsasların olmadığını təsdiqləmişdir.
Əvvəllər də Qanunsuzluq Edilib
Məlum olmuşdur ki, Seymur Quliyev və keçmiş bələdiyyə sədri Orxan Adıgözəlzadə müxtəlif torpaq sahələrini qanunsuz yollarla mənimsəyib satmışlar. Adıgözəlzadə Xəzər bağları adlanan, FHN-in mühafizə zolağında yerləşən ərazidə villa tikdirmiş və ictimai parka aid sahədə obyekt inşasına başlamışdır.
Tenderdə Yeni Qalmaqal: COP29 Ərəfəsində Yaşma Fırıldağı
“SENERGY.AZ.MMC” COP29 tədbiri ərəfəsində YAŞMA yaşayış massivinin abadlaşdırılması tenderində də qalib elan olunmuşdur. Burada da eyni ssenari ilə hasarlar sökülmüş, kompensasiya verilməmiş və tikinti aparılmışdır. Sakinlər magistral yolu bağlamış, məsələ geniş rezonans doğurmuşdur. Nəticədə iş Ədliyyə Nazirliyi tərəfindən araşdırılmış və Korrupsiyaya qarşı Mübarizə Baş İdarəsinə göndərilmişdir.
⸻
Biz Ədalət Tələb Edirik!
Torpaq sahibləri qanunsuzluğa qarşı hüquqi mübarizəni davam etdirir. Onlar dövlət orqanlarından ədalətin bərpasını, mülkiyyət hüquqlarının qorunmasını və təhdidlərə son qoyulmasını tələb edirlər.
Təsadüf Yoxsa Qohumbazlıq?
Xüsusilə qeyd etmək lazımdır ki, adı hallanan keçmiş bələdiyyə sədri Orxan Adıgözəlzadə, hazırda Sumqayıt Şəhər İcra Hakimiyyəti başçısının birinci müavini vəzifəsində çalışan Teymur Səmədovun yaxın qohumudur. Bu yaxınlıq onların Sumqayıtdakı torpaq münasibətlərinə qeyri-rəsmi təsir imkanlarının olduğunu göstərir.
Bu fakt, torpaq sahiblərinin qarşılaşdığı təzyiqlərin və qanunsuz müdaxilələrin arxasında səlahiyyətli şəxslərin qeyri-rəsmi müdafiəsinin olduğunu ehtimal etməyə əsas verir. Rəsmi mövqelərdən istifadə edərək şəxsi və kommersiya maraqlarını həyata keçirmək cəhdləri hüquqi və etik baxımdan ciddi narahatlıq doğurur.(İfadetv)
[center]
[/center]
