Gül kollarının alınması məxfi məlumatdır? – Şabranda müəmmalı tender
[center]
[/center]
[/center]Şabran rayon İcra Hakimiyyəti Başçısının Şabran şəhəri üzrə nümayəndəsi “Kanon 9” MMC (VÖEN – 6701787811) ilə ümumi dəyəri 16 min 400 manat olan 2 müqavilə bağlayıb.
Müqavilələrin keçirilən tender müsabiqələrindən (Kotirovka sorğusu) sonra imzalandığı bildirilir.
Dəyəri 8 min 200 manat olan müqavilənin biri həmişəyaşıl gül kolları və mövsümi güllərin satın alınması, eyni məbləğdə olan digər müqavilə isə gül kollarının alınması ilə bağlıdır.
Qeyd edək ki, gül kollarının alınması ilə bağlı tender müsabiqəsinin dövlət satınalmalarının vahid internet portalından kənar keçirildiyi bildirilir.
Xatırladaq ki, “Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla satınalmalar yalnız portal vasitəsilə həyata keçirilir.
Məlumat üçün bildirək ki, “Kanon 9” MMC 10 ay əvvəl - 25 sentyabr 2024-cü il tarixində dövlət qeydiyyatına alınıb. Nizamnamə kapitalı 10 manat olan MMC-nin hüquqi ünvanı Saatlı rayonunun Əlisultanlı kəndində yerləşir. MMC-nin qanuni təmsilçisi İmanov Elşən Məhəmmədəli oğludur.
Onu da bildirək ki, açıq internet resurslarda barəsində məlumat olmayan “Kanon 9” MMC qısa müddət əvvəl qeydiyyata alınmasına baxmayaraq bu günə kimi dövlət qurumlarının keçirdiyi çoxsaylı tender müsabiqələrinin qalibi olub. Açıqlanan rəsmi məlumatlara görə hazırda “Kanon 9” MMC-nin dövlət büdcəsinə vaxtında ödənilməyən 1 290 manat 36 qəpik vergi borcu da var.
“Dövlət satınalmaları haqqında” Qanunun 23-cü maddəsində isə göstərilir ki, vergilər və digər icbari ödənişlər üzrə vaxtı keçmiş öhdəlikləri olan şirkətlərin tender müsabiqəsində iştirakına yol verilmir.
Şabran rayon İcra Hakimiyyəti Başçısının Şabran şəhəri üzrə nümayəndəsi müsabiqəni portaldan kənar keçirdiyi üçün müqavilənin nə zaman imzalandığı, “Kanon 9” MMC-nin müqavilə imzalanan zaman borcunun olub-olmadığı da məlum olmur.
Yeniavaz.com
