[center][/center]
Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyi publik hüquqi şəxsi tərəfindən “Azərbaycan Karyera İnkişaf Forumu 2025” və “Naxçıvan Karyera Forumu 2025” təşkili xidmətlərinin satın alınması üzrə 23.06.2025-ci ildə başlanılmış açıq tenderə yekun vurulub. Müsabiqənin qalibi “RR TRAVEL COMPANY” Məhdud Məsuliyyətli Cəmiyyəti seçilib və tərəflər arasında 244.938,5 manat dəyərində satınalma müqaviləsinin imzalanması planlaşdırılır. Məlumat satınalmaların portalında 21.08.2025- ci ildə dərc edilib.

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “RR TRAVEL COMPANY” (VÖEN:1305786331) Məhdud Məsuliyyətli Cəmiyyətinin Bakı şəhəri Lokal Gəlirlər Baş İdarəsində 21.11.2018-ci ildə dövlət qeydiyyatına alınıb. Nizamnamə kapitalı 10 manat olan şirkətin hüquqi ünvanı BAKI ŞƏHƏRİ, YASAMAL RAYONU, MİRƏLİ SEYİDOV, ev.35, m.3 -də yerləşir. MMC-nin qanuni təmsilçisi Şirvanskaya Günəş Yəhya qızıdır. Reyestr məlumatlarında MMC-nin Kərimov Fuad İsmayıl oğlu tərəfindən təsis edildiyi göstərilir.

Satınalmaların portalı üzərindən apardığımız araşdırmada məlum oldu ki, “RR TRAVEL COMPANY” MMC tender bazarının aktiv iştirakçılarındandır. MMC yalnız 2025-ci ilin son beş ayı ərzindən ölkənin müxtəlif bölgələrində bəzi dövlət qurumları tərəfindən keçirilmiş 26 açıq tender və kotirovka sorğularının qalibi seçilib. MMC daha çox tədbirlərin təşkil edilməsi üzrə keçirilmiş satınalmaların qalibi olub.

Məsələn, son beş ayda MMC ilə Tovuz rayon İcra Hakimiyyəti büdcədənkənar vəsait hesabına rayon ərazisində il ərzində anım günləri, hüzn günləri, dövlət və peşə bayramları ilə əlaqədar keçiriləcək tədbirlərin təşkili üzrə 141.570,5, Mədəniyyət Nazirliyinin tabeliyində “Əsaslı Tikinti və Təchizat” Məhdud Məsuliyyətli Cəmiyyəti qonaqlama (mehmanxana) xidmətlərinin satın alınması üzrə 678.677, Azərbaycan Milli Elmlər Akademiyası keçirilməsi nəzərdə tutulan tədbirlərin təşkil olunması xidmətlərinin satın alınması üzrə 113.549,04, Milli Elmlər Akademiyasının Nizami Gəncəvi adına Ədəbiyyat İnstitutu beynəlxalq və Respublika elmi konfransların təşkil xidmətlərinin satınalınması üzrə 91.892,5, Şabran rayon İcra Hakimiyyəti tədbirlərin təşkil edilməsi xidmətlərinin satın alınması üzrə 66.788, “Azərbaycan Yerüstü Nəqliyyat Agentliyi” publik hüquqi şəxsi beynəlxalq yük və sərnişin daşımalarının təşkili çərçivəsində xarici ölkə vətəndaşlarının qonaqlama xərcləri üçün müxtəlif növ xidmətlər üzrə 137.130,16, Naxçıvan Dövlət Universiteti tədbirlər və konfransların təşkili xidmətinin satınalınması üzrə 107.763,5, “Azərbaycan Respublikası İqtisadiyyat Nazirliyinin Tikinti-Təchizat Birliyi” Məhdud Məsuliyyətli Cəmiyyəti 2025-ci ildə keçiriləcək Azərbaycan-Rusiya Regionlararası Forumun təşkil edilməsi üzrə 299.786,08, Azərbaycan Dövlət Neft və Sənaye Universiteti publik hüquqi şəxsi”Azərbaycan Dövlət Neft və Sənaye Universiteti” PHŞ nəzdində fəaliyyət göstərən Azərbaycan-Fransız Universiteti (UFAZ) üçün aviabiletlərin satınalması üzrə 159.000 manat məbləğində müqavilələr bağlayıblar.

Satınalmaların portalından götürdüyümüz bu məlumatlardan da görsəndiyi kimi “RR TRAVEL COMPANY” MMC respublikanın ayrı ayrı bölgələrində tədbirlərin təşkil edilməsi xidmətlərinin əsas təchizatçısıdır. Amma…

Gədəbəy rayon İcra Hakimiyyəti 18.08.2025-ci ildə dövlət satınalmalarının internet portalına bir elan yerləşdirib. Sözügedən elanda qeyd edilir ki, “Gədəbəy Rayon İcra hakimiyyəti tərəfindən “Gədəbəy rayonunda dövlət bayramları və digər əlamətdar günlərlə bağlı tədbirlərin keçirilməsi üçün xidmətlərin və zəruri olan malların satın alınması” (müsabiqə nömrəsi 106609) predmeti üzrə keçirilmiş satınalmada qalib olan “RR TRAVEL COMPANY” Məhdud Məsuliyyətli Cəmiyyəti ilə bağlanmış 20 iyun 2025-ci il tarixli 07 saylı satınalma müqaviləsi ləğv olunmuşdur. Əsas: Təchizatçı tərəfindən satınalmanın şərtlər toplusunda və uyğun olaraq satınalma müqaviləsində nəzərdə tutulan malları təqdim edə bilməməsi.

Satınalmaların portalı üzərindən apardığımız araşdırmada məlum oldu ki, Gədəbəy rayon İcra Hakimiyyəti tərfindən Gədəbəy rayonunda dövlət bayramları və digər əlamətdar günlərlə bağlı tədbirlərin keçirilməsi üçün xidmətlərin və zəruri olan malların satın alınması üzrə keçirilmiş kotirovka sorğusunun qalibi “RR TRAVEL COMPANY” MMC olub və tərəflər arasında 45.584,88 manat dəyərində satınalma müqaviləsinin bağlanılması barədə məlumat portalda 12.06.2025-ci ildə dərc edilib.

Üstündən iki ay keçdikdən sonra Gədəbəy rayon İcra Hakimiyyəti təchizatçı tərəfindən satınalmanın şərtlər toplusunda və uyğun olaraq satınalma müqaviləsində nəzərdə tutulan malları təqdim edə bilməməsi səbəbindən “RR TRAVEL COMPANY” Məhdud Məsuliyyətli Cəmiyyəti ilə bağlanmış müqaviləni ləğv edib.

Buradan suallar yaranır. “RR TRAVEL COMPANY” Məhdud Məsuliyyətli Cəmiyyəti 45 min manat dəyəri olan kotirovka sorğusunun müqavilə üzrə tələblərini icra edə bilmirsə 100-200 min manatlıq müqavilələri necə həyata keçirəcək, tədbirləri necə təşkil edəcək? Edə bilməyəcək. Çünki MMC-nin müvafiq sahədə peşəkarlığının,etibarlığının şübhə altında olduğunu Gədəbəy rayon İcra Hakimiyyəti təsdiq edib. MMC müqavilə əsasında dövlət sifarişləri həyata keçirən bir şirkətdən daha çox, tədbirlərin təşkili adı altında satınalmalar yolu ilə büdcə vəsaitlərinin silinməsində iştirakçıya oxşayır.

Sosial şəbəkələrdə yayılan məlumatlara görə “RR Travel Company” MMC turizm şirkətidir və əsasən xarici ölkələrə turizm səfərlərinin təşkili üzrə ixtisaslaşıb. Mediada yer alan məlumatlarda “RR Travel Company” MMC-nin “RR Group of Companies” MMC-yə bağlı olduğu bildirilir. Nizamnamə kapitalı 40 manat olan “RR Group of Companies” MMC 2013-cü ildə dövlət qeydiyyatına alınıb. MMC-nin sahibi Qarayev Rafiq Hümbət oğludur.

Aktualinfo.org