[center][/center]
Dünən səhər saatlarında “Hürriyyət”in redaksiyasına maraqlı məlumat daxil oldu. Bu haqda bizə informasiya verən şəxs adının anonim qalmasını istəyirdi və yalnız bu şərtlə danışmağa hazır olduğunu bildirdi. Təbii ki, onun şərtini qəbul etdik və dinləməyə başaldıq. “Bir məlumat məni çox narahat edir. Bilmirəm, o adama necə kömək edim. Fikirləşdim ki, bu məsələ mətbuatda işıqlansa, bütün qurumlar məsələdən xəbərdar olacr, problem həllini taparaq. Odur ki, bu məsələni ictimailəşdirsəniz, mənim də üzərimdən böyük yük qalxmış olar”, - deyən Respublika Narkoloji Dispanserində rastlaşdığı bir hadisəni nəql etdi:

“Günlərin bir günü bəzi səbəblərdən mənim də yolum Maştağada yerləşən Respublika Narkoloji Dispanserinə düşdü. Həmin vaxt orada müalicə alan Həsənov Camal Şamil oğlu ilə tanış oldum. Münasibət qurduq, həmsöhbət olduq. Onu danışdıqlarından sonra sanki öz dərdimi yadımdan çıxardım. Bir yandan dəhşətə gəldim ki, var-dövlət üçün bacı və qardaş adamı necə belə bir yerdə saxlatdıra bilər? Bəs, qanunlarımız? Bəs, bu quruma yoxlama gəlmir?..

Camalın mənə danışdığı çarəsizliyini olduğu kimi sizə bildirəcəm. Onu deyim ki, orda hər bir kəs öz dərdini paylaşır. Amma Camal güclü nəzarət altında saxlanılır.

O, 1960-cı il, dekabr ayının 10-da anadan olub. Ali təhsillidir. Ailəlidir. Yoldaşı və övladları Fransada yaşayır. Camalın atası Gəncə şəhərində “Motel” restoranının sahibi olub. Hazırda ata və anası dünyasını dəyişib. Camalın Gəncə və Bakı şəhərlərində əmlakları var. Əmisi və əmi uşaqları Gəncə şəhərində yaşayır. Güman edirəm ki, hər kəs onun ölkə xaricində olduğunu düşünür…

Camalın Bakıdakı 440 kvadrat metr sahəsi olan evi Süleyman Rüstəm küçəsi 48 ünvanında yerləşir. Hazırda evdə bacısı və bacısının uşaqları yaşayır.

Camalın dediyinə görə, bacısı və qardaşı istəmirlər ki, o, xəstəxanadan çıxsın, atasından ona qalan mal-mülkə sahib çıxmaq istəyirlər.

Onu da qeyd edim ki, Camal hərbçi pensiyası almalıdır. O, Birinci Qarabağ savaşında “Gəncə könüllülər korpusu”nda döyüşüb. Hərbidə ləqəbi “Qaragöz” olub. Müharibədən sonra da bir çox vəzifələrdə işləyib.

Amma, özünün iddiasına görə, pensiya almır. Hətta Camal dedi ki, hansısa həkim ona deyib, qardaşın və bacın sənin burda saxlanılmağın üçün əllərindən gələni edirlər. Dediyinə görə, 4 ildir ki, dispanserdə məcburi şəkildə saxlanılır.

Məsələ Hərbi prokurorluqda da araşdırılıb, amma...

Camal Həsənov məndən xahiş etdi, hətta yalvardı ki, ona kömək edim. Bu məsələni polisə, prokurorluğa, Səhiyyə Nazirliyinə bildirməyimi istədi. Adam orda çox normal danışır, heç şüursuz, hərəkətini bilməyən bir adam kimi davranmırdı.

Mən sizin sayt vasitəsilə rəsmi qurumlardan da xahiş edirəm, bir insanın həyatını heçə sayanlar cəzalandırılsın”.

Məsələ ilə bağlı Respublika Narkoloji Dispanserinin həkimi Elçin Abışovla əlaqə saxladıq. O, bildirdi ki, bizdən az əvvəl “802” xidmətindən də (Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası – red.) bu məsələ ilə maraqlanıblar:

“Onlara da dediyim kimi, xəstə hazırda psixotrik vəziyyətdədir. Xəstənin vəziyyəti olduqca ağırdır. Bir qohumunu biz tanıyırıq, həmin şəxs isə Azərbaycanda deyil, ayın 5-10-u arası gəlməlidir. Bir də burda yaşayan bacısı qızı var. Həmin yaxın qohumunu artıq mərkəzə dəvət etmişəm.

Camal özünü idarə edə bilmir. Ayın tarixini, harda olduğunu bilmir. Nə vaxt gəlib, onların heç birini bilmir. Qohumu gəlsin, biz xəstəni ona təhvil verməyi düşünürük. Amma biz onu belə buraxa bilmərik. Çünki şəxs özünü bilmir. Bacısı, qardaşı haqqında dediklərinizdən isə mən məlumatsızam. Evi, pulu, nəyi var, bilmirəm”.

Elçin Abışov onu da qeyd etdi ki, ola bilsin, burda yatan hansısa xəstəyə özü haqqında məlumat verib: “Sizin zəngdən qabaq xəstə ilə birgə direktorun qəbuluna getdik. Direktor və müavin mən olmadan onu danışdırdılar. Ayın əvvəli onun qohumunu gözləyirik. Yaxınına da bildirdim ki, xəstəniz burada qalmaq istəmir. Əslində, xəstə mənimlə danışanda qalmaq istəyir, ya istəmir, onu da demir. Çünki zamanı, məkanı itirib, özünü bilmir.

Mən xəstənin tək qohumu olan bacısı qızını tanımışam. Çünki dəfələrlə gətirib burda yatızdırıblar. Bu adamda xroniki alkoqalizm olduğu üçün təkrar müalicələrdə olub.

Direktorun qəbulunda xəstə özü dedi ki, 21 gün yatmışam, 2-ci 21 günümün tamam olmağına isə 2 gün qalıb.

Burdan çıxan digər xəstə bu məlumatı yayır. Prokurorluğa, Səhiyyə Nazirliyinə də müraciət edib. Lakin məlumat öz təsdiqini tapmamışdır. Hətta belə bir məlumat da var idi ki, guya, xəstə 860 manat pensiya alır. O adam dövlətdən heç nə almır. Biz onu bu gün buraxsaq, o, yolunu belə, gedib çıxa bilməyəcək. Biz onu ölümə tərk edə bilmərik, yaxını gəlib götürməlidir”.

Məsələ ilə bağlı Səhiyyə Nazirliyinə və Baş Prokurorluğa da məlumat göndərilib. Rəsmi cavabı tezliklə oxucularımızla bölüşəcəyik.

P.S. Məsələnin nə qədər doğru və yaxud da yalan olduğunu biz deyə bilmərik. Əlimizdə olan imkan daxilində araşdırma apardıq. Camal Həsənovun adına olan əmlaklar, var-dövlət bu məsələnin doğru ola biləcəyi ehtimalını önə çəkir. Doğrudur, həkim onu özünü bilmədiyini, yəni şüurunu özündə olmadığını iddia edir. Amma onun bizə ötürdüyü məlumatlar bunun tam əksini deyir. Odur ki, biz məsləni ictimailəşdirib, C.Həsənova dəstək göstərilməsi ilə bağlı bir daha rəsmi qurumlara müraciət edirik.

P.P.S. Camal Həsənovun yaxınlarının, qohumlarının da mövqeyini dərc etməyə hazırıq.