Diplomu tanınmayan hərbçi: “TKTA mənə qarşı qərəzli münasibət göstərir”
[center]
[/center]
[/center]Azərbaycan vətənpərvəri, Şuşa şəhərində xidmət etmiş keçmiş hərbi qulluqçu Səfərov Pərviz Arzuman oğlu redaksiyamıza müraciət edərək Təhsildə Keyfiyyət Təminatı Agentliyinin (TKTA) fəaliyyəti ilə bağlı ciddi iddialar səsləndirib. Onun sözlərinə görə, diplomunun tanınması ilə bağlı 4 ildən çoxdur davam edən proses süni şəkildə uzadılıb və nəticədə haqsızlıqla üzləşib.
Dörd il sürən gözləmə və əsassız imtina
Pərviz Səfərov bildirir ki, o, 2020-ci ildən etibarən Ukraynada yerləşən Avqustin Voloşin adına Karpat Universiteti tərəfindən verilmiş ali təhsil diplomunun tanınması üçün TKTA-ya müraciət edib. Lakin müraciət tam dörd il ərzində müxtəlif bəhanələrlə süründürülüb.
Nəticədə 28 noyabr 2024-cü ildə Agentlik onun diplomunun tanınmasından imtina edib. Səbəb kimi isə “təhsil aldığı ölkədə kifayət qədər olmaması” göstərilib.
Məhkəmə qərarı və TKTA-nın etirazı
Səfərov bu qərarla razılaşmayaraq Gəncə İnzibati-İqtisad Məhkəməsinə müraciət edib. Məhkəmənin 29 iyul 2025-ci il tarixli E-2-1(114)-2526/2025 saylı qərarı ilə onun iddiası təmin olunub və diplomun tanınması haqqında şəhadətnamənin verilməsi öhdəliyi TKTA-nın üzərinə qoyulub.
Lakin qərarın icrası zamanı yeni gərginliklər yaranıb. Pərviz Səfərovun xaricdə yaşadığı üçün şəhid ailəsi üzvü olan anası TKTA-ya gedərək məhkəmə qərarını təqdim edib. Agentlikdə ona bildirilib ki, şəhid ailəsi statusunu təsdiqləyən sənədlər təqdim edildikdən sonra şəhadətnamə veriləcək.
Ancaq 9 sentyabr 2025-ci ildə sənədləri təqdim etdikdən sonra Pərviz Səfərovun anasının səhhəti qəfil pisləşib və Təcili Tibbi Yardım çağırılıb.
“TKTA sədri anamın üzünə sillə vurdu”
İddialara görə, Təcili Yardım gəlməzdən əvvəl Agentliyin rəhbəri anaya qarşı etikadan kənar rəftar sərgiləyib. Pərviz Səfərovun sözlərinə görə, TKTA sədri onun anasının üzünə sillə vuraraq “get, narahat olma, sənə kömək edəcəyəm” deyib. Hadisə baş verdiyi məkanın təhlükəsizlik kameralarına da əks olunub.
Anası xəstəxanadan çıxdıqdan sonra məlum olub ki, Agentlik məhkəmə qərarını icra etmək əvəzinə, əksinə, apelyasiya şikayəti verərək qərarı şübhə altına alıb. Səfərov bunu “dövlət məhkəməsi tərəfindən çıxarılan qərara hörmətsizlik” kimi qiymətləndirir.
Şuşada xidmət etdiyini bildirən Səfərov qeyd edir ki, hərbi xidməti dövründə bir çox fəxri fərman və təşəkkürnamələrlə təltif olunub.
“Mən ailəli, iki övlad atası olaraq könüllü şəkildə xidmət etmişəm. Mənim yeganə məqsədim təhsilimi və biliklərimi dövlətimin maraqları naminə istifadə etməkdir. Təəssüf ki, TKTA-nın qərəzli münasibəti və məhkəmə qərarına etinasızlığı mənə bu imkanı vermir”, – deyə Pərviz Səfərov bildirir.
Səfərovun iddialarına görə, baş verən hadisələr təhlükəsizlik kameralarında əks olunub və bununla bağlı hüquq-mühafizə orqanlarının araşdırma aparması zəruridir. O, dövlət qurumlarından məhkəmə qərarının icrasını təmin etməyi, həmçinin anasına qarşı baş verən hərəkətlərin hüquqi qiymət almasını istəyir.
Hadisə həm hüquqi, həm də mənəvi baxımdan ciddi suallar doğurur. Məhkəmə qərarının icrasından yayınma və vətəndaşa qarşı qeyri-etik davranış iddiaları dövlət orqanlarının fəaliyyətinə etimadı sarsıdır.
Bakunews.az olaraq, biz məsələ ilə bağlı Təhsildə Keyfiyyət Təminatı Agentliyinə sorğu göndərmişik. Cavab daxil olduqdan sonra onu da oxucularımızın diqqətinə təqdim edəcəyik.
Bakunews.az
