Onkologiya sahəsini monopoliyaya alan deputata bağlı şirkət: 11 ayda 103 milyon pul...
[center]
[/center]
[/center]Azərbaycanda millət vəkillərinə bizneslə məşğul olmaq qadağan olsa da, reallıqda vəziyyət başqadır. Onların bəziləri biznesini yaxınlarının, ailə üzvlərinin adına keçirsələr də, bəziləri elə öz adı ilə şirkətlər açır, heç nə olmamış kimi öz imperiyalarını idarə edirlər.
Biznesmen deputatlardan biri də 9 saylı Binəqədi seçki dairəsindən V, VI, VII çağırış deputat seçilən Kamaləddin Qafarovdur. Bu deputat bir neçə şirkətdən ibarət böyük biznes imperiyasına, zəncinvari apteklər şəbəkəsinə rəhbərlik edir.
Bu şirkətlərdən biri də "Azəri Med” Qapalı Səhmdar Cəmiyyətidir. Sözügedən şirkət dövlət tenderlərindən 2025-ci ilin 11 ayı içərisində ümumilikdə nə az, nə çox – 103 milyon manatlıq tender udub. Bu tenderlər dövlətin müxtəlif qurumlarının keçirdiyi tenderlər olsa da, nə hikmətdirsə, dərman preparatları tenderlərinin, demək olar ki, hamısını Kamaləddin Qafarovun şirkəti qazanıb. Hələ də 1 ayını yaşamadığımız 2025-ci ilin 11 ayı ərzində 103 milyon manatlıq tenderi 1 şirkətin qazanması haqlı suallar doğurur və bu suallardan biri də əksər qurumların eyni şirkətlə çalışmasıdır.
Bu tenderlər arasında maraqlı bir nüans isə davam edən noyabr ayında 2 gün içində "Azeri Med” 2 tender qazanıb. Noyabr ayının 19-u 1.183.585,91 manatlıq (1 milyon 183 min 585 manat 91 qəpik) Akademik M. Topçubaşov adına Elmi Cərrahiyyə Mərkəzinin "Maşın və avadanlıqların satın alınması – Tibbi cihazlar və alətlər” tenderini "Azeri Med” qazanıb. Bundan iki gün sonra, yəni noyabrın 21-i (4 gün öncə) Azərbaycan Respublikası Dövlət Gömrük Komitəsi Tibbi Xidmət İdarəsinin Mərkəzi Hospitalının keçirdiyi 129.941,54 (129 min 941 manat 54 qəpik) manatlıq tenderi də eynilə "Azeri Med” qazanıb.
Cəmi 2 gün ərzində "AzeriMed” milyon yarımlıq tender qazanıb. Azərbaycan kimi kiçik bir ölkədə sadəcə 1 şirkət 2 günə milyon yarımlıq tenderi qazanırsa, bu o deməkdir ki, burada şəffaflıq sual altındadır və bu qurumların keçirdiyi tenderlər formal xarakter daşıyır.
Kamaləddin Qafarovun şirkətinin qazandığı ən "yağlı” tenderlərdən biri adaşı Kamalləddin Heydərovun rəhbərlik etdiyi Fövqəladə Hallar Nazirliyinə məxsusdur. Belə ki,
adı çəkilən nazirliyin Tibb Xidməti İdarəsinin 922.274,16 manatlıq tenderinin qalibi də tanış isimdir: "Azəri Med” QSC.
Yaxud bir müddət öncə Hesablama Palatasının fəaliyyətində ciddi nöqsanlar aşkarladığı və barəsində cinayət işinin açılması üçün toplanan materiallar Baş Prokurorluğa göndərilən "İnnovasiya və Təchizat Mərkəzi” publik hüquqi şəxsi ilə "Azəri Med” arasında bağlanmış tender müqavilələrində sıfırların sayı itib. 11 ay içində "Azəri Med” Mərkəzin elan etdiyi toplam 61 milyon 150 milyon manat məbləğində tenderlərin qalibi olub:
– Orqan transplantasiyaları üçün nəzərdə tutulmuş sərfiyyat malları və ləvazimatların satın alınması. Orqan transplantasiyaları üçün nəzərdə tutulmuş sərfiyyat malları və ləvazimatların satın alınması. – 111.868,13 AZN
– Tibb müəssisələri üçün endovaskulyar anevrizma və transkateter aorta implantasiyası üzrə sərfiyyat malları və ləvazimatların satın alınması – 4.886.380 AZN
– Klinik biokimya, hormon, seroloji, immunoloji və digər adda müayinələrinin istifadəsi üçün nəzərdə tutulmuş laboratoriya testlərinin satın alınması (12 tibb müəssisəsi üzrə) – 21.500.080,26 AZN
– Klinik biokimya, hormon, seroloji, immunoloji və digər adda müayinələrinin istifadəsi üçün nəzərdə tutulmuş laboratoriya testlərinin satın alınması (5 tibb müəssisəsi üzrə) – 8.496.116,36 AZN
– Klinik biokimya, hormon, seroloji, immunoloji və digər adda müayinələrinin istifadəsi üçün nəzərdə tutulmuş laboratoriya testlərinin satın alınması (5 tibb mərkəzi üzrə) – 14.759.980,44 AZN
– Tibb müəssisəsində istifadə üçün nəzərdə tutulmuş tibbi avadanlıq, cihaz və tibbi inventarların satın alınması – 755.418,23 AZN
– Yeni Klinika tibb müəssisəsində istifadə üçün nəzərdə tutulmuş laboratoriya testləri”nin satın alınması – 10.640.098,35 AZN
Qeyd edək ki, Hesablama Palatası tərəfindən "İnnovasiya və Təchizat Mərkəzi” publik hüquqi şəxsdə aparılan kənar dövlət maliyyə nəzarəti tədbirinin nəticəsi olaraq yol verilmiş nöqsanlar səbəbindən artıq ödənilmiş 2,2 mln. manat məbləğində vəsait dövlət büdcəsinə bərpa edilib, İTS və TƏBİB tərəfindən Mərkəzlə müqayisədə daha yüksək qiymətlərin tətbiq olunduğu hallar üzrə həmin qurumlara məlumatlar göndərilib. Tibbi avadanlıqların satınalınması zamanı ehtimal olunan qiymətin yüksək müəyyənləşdirilməsi halları, eləcə də audit sübutlarının toplanmasında yaranan məhdudiyyətlər və cinayət tərkibinin əlamətlərinin olma ehtimalı nəzərə alınaraq auditin nəticələri barədə müvafiq materiallar Azərbaycan Respublikasının Baş Prokurorluğuna göndərilib.
"Tender çempionu” "Azəri Med”ə gəlincə, 2025-ci ildə tender qazanma "uğurları” Bakıdan kənara, Naxçıvana qədər uzanır. Tək Bakıdakı dövlət qurumlarının tenderlərini caynağına almaqdan gözü doymayan şirkətin tender qalibiyyətləri Naxçıvan Muxtar Respublikasına qədər uzanır. Maraqlıdır ki, Naxçıvanda 2025-ci ildə cəmi 5 dərman preparatı tenderi keçirilib və bu tenderlərin hamısını "Azeri Med” qazanıb.
Qazandığı tenderlərlə bütün Azərbaycanı əhatə edən "Azeri Med”in son 11 ayda qazandığı 103 milyon manatlıq tender imperiyası hər il bu qədər tender qazanarsa, K. Qafarov yaxın illər ərzində dünyanın milyonçuları sırasına tezliklə girə bilər.
Ümid edirik, aidiyyəti qurumlar bu şirkəti və bu şirkətə dayanmadan tender verən qurumları nəzarət altına alaraq bir-bir incələyəcək.
Yazıda adı keçən şəxs və qurumların mövqeyini yayımlamağa hazırıq.
Mənbə: yenicag.az
