İcra başçısı 3 vətəndaşa qarşı məhkəmə davası açdı - Torpaq zəbti, ödənməyən arpa pulu...
[center]
[/center]
[/center]Şabran rayon İcra Hakimiyyətinin başçısı Asif Hüseynov Xaçmaz Rayon Məhkəməsinə 3 rayon sakini ilə bağlı xüsusi ittiham qaydasında şikayət verib. Başçının qəzəbinə gələnlər rayonun Qarabağlı qəsəbə sakini Məhəmməd Əvəz oğlu Məmmədov, Uzunboyad kənd sakinləri Səbirə Vəliyeva və oğlu Vüsal Muradovdur.
Musavat.com xəbər verir ki, icra başçısı Muradovların Cinayət Məcəlləsinin 147-ci (böhtan) maddəsi, Məhəmməd Məmmədovun isə bu maddəylə yanaşı 148-ci (təhqir) maddəsi ilə xüsusi ittiham qaydasında cəzalandırılmasını tələb edir.
“Arpanın pulunu vermədi” – kəndlilərin 3 ildir bitməyən problemi
Bu, Asif Hüseynovun Muradovlarla bağlı ilk şikayəti deyil. Bundan öncə başçı Şabran Rayon Məhkəməsinə xüsusi ittiham qaydasında şikayət vermişdi. Başçını narazı salan isə kənd sakinlərinin mətbuat üzərindən ondan aldığı arpanın pullarını tələb etmələridir. Şabran rayon Uzunboyad kənd sakini Vüsal Muradov mətbuata müraciət edərək Şabran rayon İcra Hakimiyyətinin rəhbəri Asif Hüseynovun onlara olan borcu ödəməməsindən şikayətlənmişdilər. Kənd sakini iddia edib ki, anası Səbirə Vəliyeva 2022-ci ildə ümumi dəyəri 10 min 500 manat olan 15 ton toxumluq arpanı icra başçısına nisyə satsa da, pulunu ala bilməyib. Arpa satılan zaman icra başçısı özü qapıya gəldiyi üçün ona inanıblar və alış-verişlə bağlı hər hansı sənəd imzalamayıblar.
“Yox, sənəd yox. Elə-belə inandıq da. Dedik daha bu boyda rayonun başçısıdır. Mən onunla sənəd imzalayım, notariusa aparım, qol çəkdirim ki, nisyə verirəm? Elə olmur axı, ay müəllim, ayıbdır. Dedi, verdim. Mən də inandım ki, daha bu boyda rayonun başçısıdır da, yalan danışmaz”, - Vüsal Muradov “BBC Azərbaycanca”ya demişdi.
Həmin müsahibəsində Vüsal Muradov qeyd etmişdi ki, 1995-ci ildən toxumluq arpa əkməklə məşğul olub, ailəsinin bu kiçik təsərrüfatla dolandırlıb.
Sitat:
- 3 ildir icra başçısı pulu vermədiyi üçün, artıq sahəsini normal əkib-becərə də bilmirik.
“İşlərin qızğın vaxtıdır. Texnikalar düzəlməlidir, işlər görülməlidir. Pulumuzu vermir ki, işimizi görək”, - kənd sakini bildirib.
Prezident Administrasiyası da məsələyə qarışdı, amma…
Kənd sakini deyir ki, pulu almaq üçün müvafiq qurumlara şikayət edib, ancaq nəticə olmayıb.
Prezident Administrasiyasının əməkdaşı Habil Əzməmmədov 2025-ci il oktyabrın 20-də BBC-yə bildirib ki, icra başçısının vətəndaşı qəbul etməməsi ilə bağlı məsələyə aydınlıq gətiriləcək və gün ərzində kənd sakininin icra başçısı ilə görüşü təmin ediləcək. Şikayətlə bağlı isə qurumun əməkdaşı deyib ki, vətəndaş problemin həlli ilə bağlı məhkəməyə müraciət etməlidir.
“Burada arbitr məhkəmədir. Hərə öz sübutunu ortaya qoymalıdır. Məhkəmə artıq araşdırmalı və qərar qəbul etməlidir ki, kim burada dələduzluq edib, etibar və inamdan sui-istifadə edib aldadıbdır. Orada şahidlər olacaq da, deyəcək gözümüzün qabağında yığmışıq, aparıb. Bir nəfərin işi deyil axı 15 ton taxılı yığmaq. Ona görə vətəndaşa məhkəməyə müraciət etməsi tövsiyə olunur”, - Habil Əzməmmədov deyib.
Oktyabrın 20-də ailə deyib ki, BBC-yə şikayətdən sonra onlara Şabran rayon İcra Hakimiyyətinin rəhbəri Asif Hüseynovun Səbirə Vəliyeva və oğlu Vüsal Muradovla görüşmək istədiyi bildirilib.
Bundan bir neçə gün sonra isə Şabran Rayon Məhkəməsinə icra başçısı Asif Hüseynovun xüsusi ittiham qaydasında şikayəti daxil olub.
Məhkəmə icra başçısının şikayəti üzrə araşdırma aparıb, müəyyən edilib ki, iş üzrə cavabdehlər ilkin olaraq müraciət etdikləri media resursu Xaçmaz rayonu ərazisində yerləşir. Bunu əsas götürən məhkəmə işə aidiyyatı üzrə baxılmasının vacibliyini vurğulayıb, şikayətə Şabran Məhkəməsində baxılmasının mümkünsüzlüyü diqqətə çatdırılmaqla baxışdan çıxarmışdı. Şabran İcra Hakimiyyətinin başçısı Asif Hüseynov bundan sonra Xaçmaz rayon Məhkəməsinə üz tutub.
“120 hektar torpağı zəbt edib” – ikinci qalmaqal
Musavat.com-a daxil olan məlumatda başçının eyni zamanda Qarabağlı qəsəbə sakini Məhəmməd Əvəz oğlu Məmmədovla bağlı da Xaçmaz Rayon Məhkəməsinə xüsusi ittiham qaydasında şikayət təqdim edib. Asif Hüseynovu narazı salan Məhəmməd Məmmədovun mətbuata açıqlamlarıdır. Məhəmməd Məmmədov iddia edib ki, başçı 2021-ci ildən Qarabağlı yaxınlığındakı 120 hektar örüş sahələrini zəbt edib. Bu səbəbdən də kəndlilər mal-heyvanlarının örüşə çıxara bilmirlər. Məcbur qalıb mal-heyvanı sataraq kəndi tərk edirlər. Dövlət hesabına vurulan artezian quyuları da ərazidə olduğundan kəndlilər sudan da istifadə imkanları itiriblər.
Bu açıqlamalar başçının qəzəbinə səbəb olub və o, vətəndaşı təhqir-böhtanda ittiham edərək cinayət məsuliyyətinə cəlb olunmasını tələb edir.
Musavat.com
