"Möcüzə" Marketin sahibi əsl "möcüzə" yaradıb - Səki marketə birləşdirilib - VİDEO
[center]
[/center]
[/center]Bakı şəhərində fəaliyyət göstərən iri ticarət obyektləri bizneslərini genişləndirmək naminə artıq insanların gediş-gəlişini belə nəzərə almırlar. Onsuz da sıx olan paytaxt küçələrində piyadaların hərəkəti getdikcə çətinləşir, səkilər isə bir-birinin ardınca zəbt olunur.
Ən maraqlısı isə odur ki, adi bir vətəndaş bir daşı daş üstünə qoyan kimi əraziyə dərhal icra hakimiyyətinin nümayəndələri gəlir. Amma nədənsə böyük ticarət obyektlərinin səkiləri obyektə çevirməsi ya “görülmür”, ya da görmək istənilmir.
Bizimesr.az bildirir ki, səkilərin zəbt edilməsi halları xüsusilə Bakının Sabunçu rayonunda daha qabarıq şəkildə müşahidə olunur. Piyadalar üçün nəzərdə tutulan yollar obyekt sahibləri tərəfindən tutulur, insanların rahat və təhlükəsiz hərəkəti məhdudlaşdırılır. Maraqlıdır ki, bu qanunsuzluqlara hansı qurumun və hansı səbəbdən göz yumduğu hələ də cavabsız sual olaraq qalır.
Belə hallardan biri də Bakıxanov qəsəbəsində yerləşən “Möcüzə” marketin qarşısında qeydə alınıb. Videogörüntülərdən də açıq şəkildə görünür ki, marketin sahibi səkini tamamilə zəbt edərək obyektin ərazisini genişləndirib. Lakin bu açıq-aşkar qanunsuzluğa qarşı hər hansı müdaxilə edilmir.
Ortaya haqlı bir sual çıxır: əgər rayon icra hakimiyyəti bu tip tikililərə hansısa formada göz yumursa, bəs Azərbaycan Respublikası Dövlət Şəhərsalma və Arxitektura Komitəsi hara baxır?
Səkilər piyadalar üçündür, biznes üçün yox. Aidiyyəti qurumların bu cür hallara münasibəti isə ictimaiyyət üçün getdikcə daha çox maraq doğurur.(Bizimesr.az )
