[center][/center]
“Azərbaycan Xəzər Dəniz Gəmiçiliyi” Qapalı Səhmdar Cəmiyyəti İdarə Heyətinin sədri Rauf Vəliyev 13 ilə yaxındır çalışdığı vəzifədən uzaqlaşdırıldı. Bu barədə yanvarın 16-da Prezident İlham Əliyev sərəncam imzalayıb. Sərəncama əsasən, R.Vəliyev işdən çıxarılıb.
Sabiq sədrlə bağlı mətbuatda tez-tez şikayət və korrupsiya iddiaları dolaşdırdı. Şikayətlər əsasən, pul qarşılığında işə götürmə və işçilərin hüquqlarının tapdalanması ilə bağlı idi.

Mətbuatda Xəzər Dəniz Gəmiçiliyində hökm sürən neqativ hallar barədə yetərincə məlumatlar getsə də R.Vəliyev susmağa üstünlük verirdi. Məsələn, Sumqayıt şəhəri, 41-ci məhəllə, ev 1a, mənzil 40-da yaşayan Fariz Həsənov Prezident İlham Əliyevə və Birinci vitse-prezident Mehriban Əliyevaya ünvanladığı müraciətdə R.Vəliyevin qəbulunda olmağına baxmayaraq, ondan işə düzəlmək üçün 5 min manat pul istənildiyi barədə ittiham irəli sürüb.

Daha bir məlumat isə R.Vəliyevin topladığı çirkli pulların ofşor zonalara transfer edilməsi ilə bağlıdır. Beynəlxalq Araşdırmaçı Jurnalistlər Konsorsiumunun dərc etdiyi siyahıda onun adının çəkilməsi heç də təsadüfi deyil.

Qeyd olunur ki, Bakı şəhəri, Bəşir Nuriyev 77 ünvanında qeydiyyatda olan R.Vəliyev 16 noyabr 2000-ci ildə İsveçrənin Cenevrə şəhərində Braxon Group S.A şirkətini yaradan dörd şəxsdən biri olub (vizual). Daha sonra şirkət Britaniyanın Virgin adalarında fəaliyyətini davam etdirib.

Rauf Vəliyev “Xəzər Dəniz Gəmiçiliyi” QSC-nin sədri təyin olunmazdan əvvəl uzun müddət SOCAR-da çalışıb. O, qurumun Nəqliyyat İdarəsinin rəisi olub.

R.Vəliyevin 2000-ci ildə Braxon Group S.A şirkətini yaradan zaman bu qurumda çalışması və birdən-birə belə yüksək vəzifəyə təyinatı onun SOCAR-ın keçmiş prezidenti Rövnəq Abdullayevlə yaxın münasibətləri olduğundan xəbər verir.

Ümumiyyətlə oliqarxa çevrilən R.Vəliyevin topladığı pulların xaricdə müəyyən işlərə yatırması barədə məlumatlar da diqqət çəkir. Elə Azərbaycanda da lüks həyat keçirən Rauf Vəliyevin sərhədlərimizdən kənara meyl etməsi düşündürücü faktordur.

Rüşvət halları tək bunula yekunlaşmır. QSC-nin daxilində rüşvət hallarının kifayət qədər çox olması kollektivi də narazı salmışdı.

Qurumda neqativ hallar və qanunsuzluqlar o həddə çatıb ki, R.Vəliyev ağlasığmaz qərarlar verməkdən belə çəkinmir.

Mətbuatda yayılan digər bir xəbərdə Xəzər Dəniz Gəmiçiliyi rəhbərinin ağılasığmaz bir qərar verdiyi iddia olundu. Qərara görə, “Azərbaycan Xəzər Dəniz Gəmiçiliyi”nə müraciət edən bütün şəhid, Milli Qəhrəman ailələri, Qarabağ əlilləri, bir sözlə, 1-ci Qarabağ savaşında özü və yaxınları iştirak etmiş bütün şəxslərə istənilən bir mövzuda rədd cavabı verilməlidir.

Xəzər Dəniz Gəmiçiliyi ilə bağlı sonuncu qalmaqal isə istiqrazlarla bağlıdır. Nazirlər Kabinetinin 2024-cü ilin martında verdiyi qərara görə, gəmiçilik 158 milyon manat məbləğində istiqraz alıb. Amma bu 158 milyon manat istiqrazların ədalətli (bazar) dəyəri imiş və şirkət onu bazar dəyərindən ucuz (102,4 milyon manat) aldığı üçün arada yaranan 55,6 milyon manat birbaşa Xəzər Gəmiçiliyinin kapitalının artırılmasına yönəldilib.

İqtisadçı Rövşən Ağayev bildirib ki, şirkət ədalətli (bazar) dəyəri 158 milyon manat olan istiqaza real pul şəklində 102,4 milyon ödəyərək alır: “Cəmi bir neçə ay sonra bu istiqrazların yüksək səviyyədə riskli kağızlar olduğu bildirilir və istiqarazlar üzrə 69,6 milyon manat məbləğində dəyərzsizləşmə tanınır. Bu, 158 milyon manat real bazar dəyəri ilə alındığı rəsmi sənədlərə salınan, faktiki 102,4 milyon manat real pul verilərək alınan qiymətli kağızın balans dəyərinin 88,4 milyon manat təşkil etməsi deməkdir.

İstiqrazı alınan dövlət müəssisəsinin maliyyə vəziyyəti çox pis olub, ona maliyyə dəstəyin hökumətin göstərişi ilə Xəzər Gəmiçiliyinin üzərinə qoyulub.

Əməliyyatı rəsmiləşdirmək üçün borc kağızının qiyməti şişirdilib. Sonradan isə müəssisənin bu borcu qaytarmasında problem yarana biləcəyini riskini nəzərə alaraq həmin borcun az qala yarısı zərər kimi, gələcəkdə qaytarılmayacağı ehtimalı kifayət qədər yüksək olan zərər kimi tanınaraq maliyyə hesabatında tanınıb. Hesabatda qeyd edilir ki, müqavilə üzrə ödənişlərdə gecikməni və emitentin maliyyə göstəricilərinin davamlı olaraq pisləşdiyi nəzərə alınaraq bu istiqraz beynəlxalq maliyyə hesabatlılğı satandartına uyğun olaraq 3-cü mərhələyə düşüb”.

Qeyd edək ki, Vəliyev Rauf Göyüş oğlu 1965-ci ildə Cəbrayıl rayonunun Çərəkən kəndində anadan olub. 1990-cı ildə Leninqrad Su Nəqliyyatı İstitutunu, 2004-cü ildə isə Azərbaycan Respublikası Prezidenti yanında Dövlət İdarəçilik Akademiyasını bitirib.

1990-1997-ci illərdə “Xəzər Dəniz Neft Donanması” İdarəsinin idarəetmə aparatında mühəndis-konstruktor, gəmi tikintisi üzrə nəzarət qrupunun mühəndisi, qrup rəhbəri, İdarənin xarici əlaqələr şöbəsinin rəisi, 1997-ci ildən isə İdarə rəisinin xarici əlaqələr üzrə müavini vəzifələrində işləyib. 2006–2007-ci illərdə Azərbaycan Respublikası Dövlət Neft Şirkətinin aparatında Donanma ilə iş üzrə şöbə rəisi, 2007-2013-cü illərdə ARDNŞ-nin Baş ofisində Nəqliyyat İdarəsinin rəisi vəzifəsində çalışıb.

Azərbaycan Prezidentinin 22 oktyabr 2013-cü il tarixli Sərəncamı ilə Rauf Göyüş oğlu Vəliyev "Azərbaycan Xəzər Dəniz Gəmiçiliyi" Qapalı Səhmdar Cəmiyyətinin sədri təyin edilib.

Azərbaycan Respublikası Prezidentinin 19 sentyabr 2011-ci il tarixli Sərəncamı ilə “Əməkdar mühəndis” fəxri adına layiq görülüb.

Yeni Sabah