Xaricdə təhsil mərkəzi tələbənin başına oyun açıb?
[center]
[/center]
Əvvəlki adı “Royal Education” olan, sonra adını xaricdə təhsil olaraq dəyişdirən şirkət barədə Baku TV-nin qaynar xəttinə şikayət daxil olub.
Türkiyəli tələbə Qonca Gül Kocaman iddia edir ki, Makedoniyada yerləşən universitetdən Türkiyənin universitetlərindən birinə köçürülmək məqsədilə bu şirkətlə əlaqə saxlayıb.
Tərəflər müəyyən pul müqabilində öz aralarında razılaşıblar və şikayətçi pulun yarısını ödəyib. Amma şirkət bunun müqabilində heç bir iş görməyib.
“Məndən 23 000 dollar tələb etdilər. Məbləğin 11 500 dollarının prosesdən əvvəl, qalanının isə proses başa çatdıqdan sonra ödənilməli olduğunu dedilər. Lakin bir il ərzində müxtəlif vaxtlarda hissə-hissə ödəniş etdim. Nəticədə 3 000 dollar artıq olmaqla, ümumilikdə 16 000 dollar ödəniş almalarına baxmayaraq, heç bir əməliyyat aparılmadı. Sonradan isə bildirdilər ki, əgər bu məsələni ictimailəşdirsəm və ya rəsmi qurumlara müraciət etsəm, Türkiyədə barəmdə məhkəmə işi açılacaq”, – deyə şikayətçi bildirib.
Şirkətin sahibi olduğunu bildirən İfrat Göyüşov isə qeyd edib ki, prosesin gecikməsinin səbəbi tələbənin ödənişləri vaxtında və tam şəkildə yerinə yetirməməsidir.
O əlavə edib ki, şirkət tərəfindən universitetə ödəniş gecikdiyi üçün qəbul prosesi növbəti ilə qalıb: “Hazırda məsələ araşdırılır. Əgər şirkətin hər hansı bir günahı müəyyən edilərsə, bunun məsuliyyətini daşımağa hazırıq”.
