İKZF Xəlil Göyüşovdan 152 milyon manatlıq yaşayış sahəsi alır
[center]
[/center]
İpoteka və Kredit Zəmanət Fondu (İKZF) satış sahələrinin satın alıması ilə bağlı tenderə yekun vurub.
Bizimesr.az xəbər verir ki, tenderin qalibi "Körpü-Bina-Tikinti" MMC seçilib.
Tərəflər arasında bağlanacaq satınalma müqaviləsinin maliyyə dəyəri 152 298 846 manatdır.
İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Körpü-Bina-Tikinti" MMC 17 sentyabr 2001-ci ildə qeydiyyata alınıb. Nizamnamə kapitalı 300 000 manatdır.
Şirkətin hüquqi ünvanı Bakı şəhəri Nərimanov rayonu, Əhməd Rəcəbli küçəsi 2, ev 1-də yerləşir. MMC-nin qanuni təmsilçisi Göyüşov Xaliq Avdil oğludur.
"Körpü-Bina-Tikinti" MMC iş adamı Xəlil Göyüşovun şirkəti kimi tanınır. Xaliq Göyüşov onun qardaşıdır. Xəlil Göyüşovun şirkətin ilk qanuni təmsilçisi olması bu iddianın əsassız olmadığına dair şübhələri artırır.
2024-cü ilin oktyabr ayında Sabunçu rayonu Asəf Əsədullayev küçəsində yerləşən tuneli su basdığı üçün 2 nəfər dünyasını dəyişmişdi. Həmin vaxt mediada gedən məlumatlarda qeyd edilirdi ki, sözügedən tunel 2019-cu ildə "Azərbaycan Dəmir Yolları" Qapalı Səhmdar Cəmiyyətinin (QSC) sifarişi ilə "Körpü Bina Tikinti" MMC tərəfindən tikilib.(Bizimesr.az)
