[center][/center]
Təhsil sistemində şəffaflıq kağız üzərində qalanda suallar da artır. Mövcud qaydalara əsasən şəhər mərkəzində yerləşən məktəbdə müəllim yeri boşdursa, həmin yer vakansiya kimi elan edilməli və müsabiqə yolu ilə tutulmalıdır. Xüsusilə də bu yer ucqar dağ kəndində deyil, rayon mərkəzində, əlçatan və tələbatın yüksək olduğu bir məktəbdədirsə, prosedurun daha şəffaf aparılması gözləniləndir.

Əldə etdiyimiz məlumata görə, Xaçmaz şəhər 9 nömrəli tam orta məktəbdə biologiya fənni üzrə boş saatlar vakansiya elan edilmədən bölüşdürülüb. Bildirilir ki, həmin dərs saatları 29.09.2025-ci il tarixində Xaçmaz rayon Padar kənd tam orta məktəbinin müəllimi Balaqadaşova Lamiyəyə ikinci iş yeri kimi təqdim edilib.

Məlumata əsasən bu proses Quba-Xaçmaz Regional Təhsil İdarəsinin İnzibati Təşkilat sektoru tərəfindən həyata keçirilir. İddialara görə, təyinat ailəvi tanışlıq əlaqələri zəminində baş tutub. Həmçinin müəllimin ailəsinin Fikrət Heybətov ilə yaxın münasibətlərinin olduğu və bu amilin qərara təsir göstərə biləcəyi iddia olunur.

Diqqət çəkən məqam ondan ibarətdir ki, söhbət müəllim çatışmazlığı olan ucqar ərazidən deyil, rayon mərkəzində yerləşən məktəbdən gedir. Belə halda vakansiyanın elan edilməməsi və digər biologiya müəllimlərinə müraciət imkanı yaradılmaması əsaslı suallar doğurur. Seçim hansı meyarlarla aparılıb və qərarın hüquqi əsasları nədən ibarətdir?

Məsələ ilə bağlı Quba-Xaçmaz Regional Təhsil İdarəsi tərəfindən ictimai açıqlama verilməyib. Bu isə təhsil sistemində hesabatlılıq və şəffaflıq məsələsini yenidən gündəmə gətirir. Qanun və qaydalar hamı üçün eyni tətbiq olunmalıdır. Əks halda şəffaflıq prinsipi formal xarakter daşıyır və ictimai etimad zədələnə bilər.

Bakunews.az olaraq apardığımız araşdırmalar zamanı Fikrət Heybətov ilə bağlı müxtəlif qanun pozuntusu iddiaları da səsləndirilib. Bu iddiaların mövcudluğu fonunda sual yaranır: məsələ ilə bağlı Məktəbəqədər və Ümumi Təhsil üzrə Dövlət Agentliyi-nin direktoru Eşqi Bağırov tərəfindən hər hansı araşdırma aparılıb, yoxsa ictimaiyyətə açıqlanmayan səbəblərdən məsələyə münasibət bildirilməyib?

İddiaların araşdırılıb-araşdırılmaması və hər hansı inzibati tədbirin görülüb-görülməməsi barədə rəsmi məlumatın olmaması əlavə suallar yaradır.

Bakunews.az səslənən iddialarla bağlı qarşı tərəfin mövqeyini dərc etməyə hazırdır. Əgər qərarın hüquqi əsasları və rəsmi sənədləri mövcuddursa, ictimaiyyətə təqdim olunmalıdır. Araşdırmalarımız davam edir və təhsil sahəsində baş verən prosesləri diqqətdə saxlamaqda davam edəcəyik.

BakuNews.az