“Şabran” istirahət mərkəzini tikəndə bax bura kimi, hansı ki, prezident gedirdi, ora kimi asfalt elədilər. Gözə görünən yeri də asfaltladılar, buraları asfaltlamadılar”.
Şabranın Pirəbədil kəndində salınan “Şabran” İstirahət Kompleksi tikiləndə kəndlərin yolları hələ dağıdılmamışdı. Kənd camaatı deyir, otelin açılışına prezident gələcəkdi deyə otelə qədər olan yol bərpa olunub, asfaltlandı. Yəni prezidentin ayağının dəydiyi yollar asfaltlı, kəndlilərin ayağının dəydiyi yol isə dağıdılmış vəziyyətdə qalıb.
“O tərəfdən çəkdilər Xəlifələr yolunu ki, prezident gələcək, prezident gələndə onlara yaxşı yol göstərəsən. 50-60 metr də guya çəkdilər Zeybə kəndinə ki, görsünlər, yol yaxşıdır. Amma Əhməd bulağından, sanatoriyadan bura və Quba-Bakı trasına qədər yollar bərbad gündədir”.
Kənd camaatının dediyinə görə, otelin tikilməsi bahasına yaxın kəndlərin yolları dağıdılıb. İndi əvvəlki asfalt yoldan əsər əlamət yoxdur.
“Yolumuz 4 il bundan qabaq dümdüz, asfalt yol idi. Sonra bu tikinti ilə bağlı yük maşınları gəldi, getdi, bizim yol pis günə qaldı”.
“Ağır yüklü maşınlar, kubik, sement, çınqılından tutmuş bu Şabran çay yolu ilə çəkdilər gəldilər. Yollarımız əvvəldən yaxşı idi. Onlar gəldilər, burada tikinti haradasa 2-3 il davam etdi. Yolu təmiz dağıtdılar, tökdülər”.
Rza Həsənov hər gün mərkəzdən kəndə gəlib çörək paylayır. Çörəyi bu işdən çıxdığından hər gün kəndə gəlməyə məcburdur. Amma bu, ona baha-başa gəlir.
“Mən kəndə gəlib çörək paylayıram. Bizim kənddə çörək sexi yoxdur. Demək olar, gündə gəlib-gedirəm. Kəndə hər gələndə gedib “plafaktoriya”da maşını təmir edirik. Bizə kəndə gəlmək üçün 30 km yol 70 manata başa gəlir. Xarici maşınlar ondan da çox. Maşın altını dəydisə 150 manatdı, elə mənim maşınım da. Ən ucuz maşın məndədir. O da sıradan çıxdı, 4 ay istəmirsən bu kəndə gələsən”.
“Maşınları, de, bizdə əsas minik maşınlarını bərbad günə qoyur. Yük maşınlarına nə var ki, onlar hər yerdə gedir də - daşda, kəsəkdə”.
Kənd camaatı yolların dağıdılmasıyla bağlı rayon icra hakimiyyətindən prezidentə qədər bütün qurumlara şikayət ünvanlasalar da, bir nəticəsi olmayıb. Onlara verilən sözlər tutulmayıb.
“Bizə çox yerdən söz verdilər ki, yolumuz tikinti qurtaran kimi düzələcək. Sonra tikinti qurtardı, “Şabran” istirahət mərkəzi tikildi. Ora qədər yollar, maşallah, asfalt, şüşə kimidir. Müraciətimiz, ərizələrimiz gedib mərkəzə. Hələ baxan yoxdur. Prezident Aparatınacan göndərilib. Hələ baxan yoxdu şikayətimizə. Söz veriblər guya ki, düzələcək. Haçanı bəlli deyil”.

Meydan TV