Astara Rayon İcra Hakimiyyəti Astara rayonunda yolların əsaslı təmiri ilə bağlı tenderə yekun vurub.

Tenderin qalibi “Elnur-2” Universal İstehsalat Kommersiya Şirkəti seçilib.

Tərəflər arasında bağlanacaq satınalma müqaviləsinin maliyyə dəyəri 527.723,35 AZN-dir.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Elnur-2” şirkəti 11 fevral 1994-cü il tarixdə dövlət qeydiyyatına alınıb. Hüquqi ünvanı Bakı şəhəri, Binəqədi rayonu, Süleyman Sani Axundov küçəsi, ev 11/35, mənzil 57 olan şirkətin qanuni təmsilçisi Abıyev Zaur Niyaz oğludur. Şirkətin nizamnamə kapitalı isə 1 manat 60 qəpikdir.

Açıq mənbələrdə "Elnur-2” şirkəti barədə hər hansı məlumat yoxdur.

Zaur Abıyevin adı isə "MTN işi”ndə keçir. İş materiallarından aydın olur ki, Zaur Abıyev də MTN-dəki məlum dəstənin hədəfinə gəlib. O, ifadəsində bildirib ki, 2013-cü ilin dekabr ayının 19-da digər zərərçəkmiş Elton Cəfərli ilə birlikdə "Texnikabank”ın "Proqress” filialından 620 min manat pul götürüb çıxarkən MTN əməkdaşları tərəfindən saxlanılıb.

Astara Rayon İcra Hakimiyyəti ötən il yolların təmirinə 1 072 944, 79 AZN xərcləyib. Satınalma müqavilələri “Elnur-2” şirkəti və “Birlik-3A” MMC ilə bağlanıb.

Astara Rayon İcra Hakimiyyətinin başçısı Qəzənfər Ağayevdir. O, 2012-ci ildən bu vəzifədədir. Qəzənfər Ağayev 2006-cı ildə Yardımlı, 2006-2012-ci illərdə isə Masalının icra başçısı vəzifəsində çalışıb.Valyuta.az