Abdullayev Paşa Ramiz oğlu 2001-ci il təvəllüddür. O, oktyabrın 1-də həqiqi hərbi xidmətə çağırılıb. Bu məqsədlə Səfərbərlik və Hərbi Xidmətə Çağırış üzrə Dövlət Xidmətinin Nizami rayon hərbi komissarlığında müayinədən keçib. Anaxeber.info bildirir ki, Paşa Abdullayev həkim müayinəsində olarkən ondan səhhətində hansı şikayətlərinin olub-olmaması soruşulub. O da təzyiq problemindən əziyyət çəkdiyini bildirib. Əlavə edib ki, xüsusən gecələr təzyiq onu narahat edir. Həkim də müayinə kağızı yazaraq təkrar müayinədən keçməyi tapşırıb ki, konkret diaqnoz qoyulsun və təkrar müayinəyə gəlsin. Paşa Abdullayevin sözlərinə görə, bir qədər sonra hərbi komissar özü gəlib və soruşub ki, bu müayinə kağızına səbəb nədir. O da deyib ki, təzyiq problemindən çox əziyyət çəkir, qıcolma halları var. Lakin hərbi komissar onu ətraflı dinləmədən, təkrar müayinənin nəticəsini gözləmədən, təzyiq, qıcolma hallarından əziyyət çəkdiyinə qulaq asmadan həkimin verdiyi kağızı cırıb atıb və deyib ki, "turp kimisən", yəni sağlam bir adamsan, oktyabrın 2-də hərbi hissəyə göndəriləcəksən. P.Abdullayev hərbi komissarın bu hərəkətini anlaşılmaz hesab edir. O, komissarın nə üçün müayinəsiz belə qərar verdiyini qəbul etmir. Ona görə də Dövlət Xidmətinin yeni rəhbərliyindən bu məsələnin nəzarətə götürülməsini xahiş edir. Narazı qalan çağırışçı qeyd edir ki, təkrar müayinə aparılsın, nəticə məlum olsun, ondan sonra əsgərliyə aparılıb-aparılmayacağı müəyyən oluna bilər.

Anaxeber.info