"Poleks" Mənzil-Tikinti Kooperativi (MTK) məhkəməyə verilib.

Pravda.az-ın əldə etdiyi məlumata görə, bu barədə İbadova Sevinc Vəkil qızı Bakı Kommersiya Məhkəməsinə müraciət edib.

O, mülkiyyət hüququ ilə əlaqədar mübahisələr barədə tələb irəli sürüb.

Sevinc İbadova MTK ilə yanaşı, Fəridə Qasımova, Minurə Qasımova, Mətanət Qasımova, Ataş Qasımov və Şahin Qasımovun barəsində də məhkəməyə iddia ərizə təqdim edib.

İddia hakim Zeynəb Axundovanın icraatına verilib.

Mayın 5-də məhkəmənin hazırlıq iclası keçirilib. Prosesdə tərəflərin anket məlumatları dəqiqləşdirilib.

Növbəti proses mayın 26-na təyin olunub.

Qeyd: daha əvvəl “Rabitəbank” ASC Sevinc İbadova ilə birgə Nərimanov Rayon İcra Hakimiyyəti başçısının keçmiş birinci müavini Şahmar İbadovla bağlı Bakı Kommersiya Məhkəməsinə müraciət edib. Bank məhkəmədə onlarla bağlı kredit müqaviləsi üzrə iddia tələbi irəli sürüb. Lakin kreditin məbləği qeyd edilməyib.

Xatırlatma: Şahmar İbadov 2020-ci ilin noyabrında müvafiq sərəncamla Nərimanov Rayon İcra Hakimiyyətinin başçısının müavini vəzifəsindən azad olunub.

Şahmar İbadovun adı bir sıra qalmaqallarda və qanunsuz əməllərdə hallanırdı.

Onu da əlavə edək ki, Şahmar İbadovun oğlu Elmar İbadov 2017-ci il avqustun 22-də idarə etdiyi "Range Rover" markalı avtomobillə yaşlı qadını vurub. Bir neçə gündən sonra qadın ölüb.

Abşeron Rayon Məhkəməsinin hökmü ilə Elmar İbadov 5 il müddətinə azadlıqdan məhrum olunub. Məhkəmə onun cəzasının məntəqə tipli cəzaçəkmə müəssisəsində çəkməsi haqqında qərar qəbul edib. Hökmdən narazı qalan Elmar İbadov apellyasiya şikayəti ilə Sumqayıt Apellyasiya Məhkəməsinə müraciət edib. Məhkəmənin qərarına əsasən, Elmar İbadovun apellyasiya şikayəti təmin olunub, birinci instansiya məhkəməsinin çıxardığı hökm ləğv edilib. Məhkəmə onun barəsində bəraət hökmü çıxarıb.

Kamal Məmmədov