Havaların qeyri-sabit keçməsi vətəndaşlara ciddi çətinliklər yaradıb. Əlverişsiz hava şəraiti bəzi ərazilərdə yol infrastrukturunu sıradan çıxarıb. Ölkə ərazisinə yağan aramsız qar Abşeron rayonunun Atyalı qəsəbəsinin yollarını da iflic edib.

Vətən müharibəsi qazisi Zahid Alıyevin KONKRET.az-a müraciəti də məskunlaşdığı qəsəbədə yolların bərbad olması ilə bağlıdır.

Müharibədən sonra vəzifəsini yerinə yetirərkən hərbi avtomobillə qəzaya düşən və hazırda əlil arabasına məhkum olan Z.Alıyev deyir ki, yaşadığı ərazidəki yolsuzluqla bağlı böyük çətinliklərlə üzləşib:

“44 günlük Vətən müharibəsi zamanı Füzuli, Qubadlı, Cəbrayıl, Daşaltı və Şuşa istiqamətlərində gedən döyüşlərdə iştirak etmişəm. 2022-ci ildə isə hərbi vəzifəmi yerinə yetirərkən Daşaltıda avtomobil qəzasına düşdüm. Onurğamdan ağır zədə aldığımdan beldən aşağı ətraflarım iflic olub. Hazırda əlil arabasına möhtacam”.

Dövlət tərəfindən müalicə edildiyini deyən qazinin sözlərinə görə, yaşadığı ərazidə yolların bərbad olması xüsusilə yağıntılı havalarda xəstəxanaya gedib-gəlməsini çətinləşdirir:

“Fizioterapiya olunmalıyam. Müalicə aldığım mərkəz isə “Əhmədli”də yerləşir. Yolları 15-20 santimetr qar örtüb, hərəkət məhdudlaşıb, ona görə də xəstəxanaya gedə bilmirəm. Küçənin yolları o dərəcədə bərbaddır ki, normal vaxtlarda belə maşınla hərəkət edəndə möhkəm silkələnmə olur. Onurğam zədələndiyinə görə belimə 8 ədəd platin qoyulub. Ona görə də maşın atıb-tutanda səhhətimə ciddi təsir edir, ağrı verir”.

Z.Alıyev bildirir ki, yağan qara görə qəsəbəyə nə avtobus, nə də taksi işləyir. Hətta təcili tibbi yardım maşınları da küçələrə girməkdə çətinlik çəkir.

“Bir neçə gündür, ümumiyyətlə, evdən çölə çıxmırıq. Övladlarım iki həftədir məktəbə gedə bilmirlər. Dörd uşaq oxuduram; iki qız, iki əkiz oğlan. Qızlar 9, 11-ci siniflərdə oxuyur. Əkizlər isə birinci sinfə gedirlər”, – deyən qazi əlavə edir ki, bu günlərdə Fövqəladə Hallar Nazirliyinin qaynar xəttinə bir neçə dəfə zəng vuraraq, yolların təmizlənməsi ilə bağlı müraciət etsə də, onlara heç bir köməklik göstərilməyib.

Vətən müharibəsi iştirakçısı deyir ki, qəsəbə sakinləri çoxsaylı sosial problemlərlə bağlı Abşeron Rayon İcra hakimiyyətinə, Hökməli kənd icra nümayəndəliyinə və Atyalı bələdiyyəsinə dəfələrlə müraciət ünvanlayıblar. Buna baxmayaraq, aidiyyəti qurumlar tərəfindən heç bir əməli addım atılmır, əksinə, qəsəbədə yaşayış səviyyəsi gündən-günə daha da ağırlaşır.

Qeyd edək ki, ötən illərdə sözügedən qəsəbənin problemləri ilə bağlı redaksiyamız tərəfindən videomaterial hazırlanaraq yayımlanmışdı. Həmin ərəfədə əlaqə saxladığımız bəzi yerli icra orqanlarından problemlərin həlli istiqamətində müəyyən addımların atılacağı vəd olunsa da, sakinlərin dediyinə görə, verilən vədlər yerinə yetirilməmiş qalıb.

Elə Z.Alıyevin redaksiyamıza ünvanladığı video və fotolardan da aydın görünür ki, sosial problemlər məngənəsində sıxılan Atyalı massivində yaşayış dözülməz hal alıb. Sakinlərin illərdir döymədiyi qapı qalmasa da, problemlərinə qarşı biganəlik onlarda dövlət qurumlarına olan inamı sarsıdır. İndi vətəndaşların yeganə ümid yeri dövlət başçısıdır.

Vətən uğrunda döyüşlərdə qüsursuz xidmət göstərən, Qubadlı, Füzuli, Şuşanın azad olunmasına görə Ali Baş Komandan İlham Əliyev tərəfindən medallarla təltif olunan Zahid Saday oğlu Alıyev də başda olmaqla qəsəbə sakinləri ölkə rəhbərinə müraciət edərək, sosial problemlərinin çözülməsi ilə bağlı müvafiq göstərişlər verməsini xahiş edirlər.

Ümid edirik ki, Atyalı sakinlərinin, xüsusən əlil arabasına məhkum olan qazi, dörd uşaq atası Zahid Alıyevin səsi yuxarı instansiyalarda eşidiləcək və onların yaşayış şəraitinin yaxşılaşdırılması istiqamətində lazımi tədbirlər görüləcək.