Xəbər verdiyimiz kimi, Azərbaycan Prezidenti İlham Əliyev Milli Məclisin buraxılması və sentyabrın 1-də erkən seçki keçirilməsi ilə bağlı sərəncam verib.

Diqqət çəkən məqamlardan biri də sabiqlərin yenidən millət vəkili olmaq arzusudur. Bu arzsunda olanlardan biri də Sabiq deputat, Gəncə Futbol Federasiyasının sədri, Gəncə avtomobil zavodunun direktoru Xanlar Fətiyevdir.

İnteret resurslarında axtarış versək Xanlar Fətiyevlə bağlı çoxsayda qalmaqalara rast gəlmək olar.

O ən çox da idmandakı skandalları ilə diqqət çəkib.

Həmin qalmaqalları 32gun.az bir daha xatırladır: Mediada gedən məlumatlara görə, 2011-ci ildə "Kəpəz" futbol klubunun fəaliyyətinin dayandırılmasında böyük əmək sahibi olub. “AzNur” şirkətinin rəhbəri Xanlar Fətiyevin “Kəpəz”ə sponsorluqdan imtina etdi və klubu "kor qoydu". Hətta o açıqlamalarının birində o (2011-ci ildə) "Gəncə Regional Futbol Federasiyasının rəhbəri olaraq mən tam rəsmi bildirirəm ki, nə "Kəpəz", nə də "Tərəqqi" fəaliyyətlərini dayandırmayacaq" demişdi. Acaq çox keçmədi ki, Azərbaycanda ən böyük azarkeş ordusuna sahib futbol klublarından biri olan "Kəpəz"i top kimi "çilədilər". Maddi sıxıntılar və digər skandalları ilə...

Xanlar Fətiyev fəaliyyət dövründə Milli Məclisin "dilsiz” deputatlarından sayılıb.

Yerli mediada gedən Məlumatlarda onun rəhbərlik etdiyi Gəncə Avtomobil Zavodunda MAZ 555102-223-600, MAZ 551605-271, MAZ 650108-270-011, MAZ 457043, MAZ 533605-222, MAZ 544005-030-030, MAZ 642208-232, MAZ 643008-070- 010, MAZ 651608-220-600, MAZ 953000-014 markalı yük maşınlarının, BELARUS 1221, BELARUS 132H, BELARUS 320, BELARUS 321, BELARUS 80.1, BELARUS 80X, BELARUS 82.1, BELARUS 892, BELARUS 921.3 markalı traktorların, eləcə də DEM-114, ESU-150, FRS-200M, KO-456-10, KO-456-16, KS-55727-1-11, M-21 x2s, MUP-320 və MUP-351 markalı xüsusi təyinatlı texnikaların baha qiymətə satıldığı vurğulanır.

Bundan başqa, 1986-cı ildə əsası qoyulmuş "Gəncə Avtomobil Zavodu”nun sovetlər birliyinin dağılması nəticəsində tikintisinin yarımçıq qaldığını və yalnız 2004-cü ilin dekabrında işə düşdüyünü vurğulayan məlumatı mənbənin cumhuriyyet.az-a bildirdiyinə görə, deputat olduğu vaxt zavodun 35 hektar ərazisini də ucdantutma satıb. Onun haqqında yayılmış digər məlumatlarda isə bildirilir ki, deputat olduğu zaman zavoda da çox ciddi maxinasiya hallarına yol verib.

2015-ci ildən yayıla digər məlumtlara görə, "Xanlar Fətiyevin daha bir "keyfiyyəti” Kür çayından Gəncə Avtomobil Zavoduna, eləcə də Avtomobilçilər qəsəbəsinə gələn 10 kilometrlərlə iri diametrli dəmir boruların satılaraq mənimsənilməsi zamanı üzə çıxıb. Amma Gəncə Avtomobil Zavodu bu günə kimi ayrılan külli miqdarda investisiyaya baxmayaraq, müəssisə müstəqil olaraq heç bir maşın növü istehsal edə bilməyib. Ötən il ərzində zavodda 1000-ci traktor konveyerdən çıxsa da, "Aqrolizinq” ASC ilə aralarında bağlanmış 35 milyon manatlıq dəyərində 500 ədəd traktorun qiymətlərini süni olaraq şişirtməklə 10 milyondan çox vəsaitin mənimsənildiyi iddia olunur. Bundan başqa, qısa müddət ərzində Gəncədə traktor istehsalının artırılması Belarusdan gətirilmiş texniki hissələrin gömrük rüsumundan azad olması ilə izah edilir. Lakin ehtiyat hissələrinin ucuz başa gəlməsinə baxmayaraq, yığılan traktorun qiyməti 25-30 min manata satılır. Yəni Xanlar Fətiyev bu sahədə şəffaflığın olmamasından yararlanaraq külli miqdarda gəlir əldə etməyə müvəffəq olur. Yəqin ki, müvafiq dövlət qurumları tezliklə bu məsələyə aydınlıq gətirəcəklər”, – deyə mənbə bildirir.

AFFA rəhbərliyinin səyləri nəticəsində Gəncə Futbol Federasiyası yaradıldı və Xanlar Fətiyev onun rəhbəri təyin edildi. Amma millət vəkili həm federasiyaya, həm də "Kəpəz”ə rəhbərliyi dövründə nəyinki heç bir irəliləyişə nail olmadı, əksinə klubu tamamilə dağıtmaqla yadda qaldı. Kluba ayırdığı cüzi maliyyəni də ora yerləşdirdiyi qohumları və yaхın adamları yedi, "Kəpəz” faktiki olaraq tariхin yaddaşına qovuşdu (indi AFFA rəhbərliyi klubu yenidən bərpa edib).

Fətiyev bu günə qədər iki federasiyaya rəhbərlik edib. Amma heç birində işininin öhdəsindən gəlməyib. Rəhbərlik etdiyi hər iki federasiyadakı işi sözün əsl mənasında fiasko ilə nəticələnib. Başlayaq Gəncə Futbol Federasiyasından. Xanlar Fətiyev ölkənin ikinci ən böyük şəhərinin futbol federasiyasına Qərb bölgəsində futbolun inkişafına nail olmaq üçün gətirilmişdi.

Azərbaycan Üzgüçülük Federasiyasına rəhbərlik edib. Amma bu federasiyada da yumşaq desək işlər ürəkaçan olmadı .

Xanlar Fətiyev ən böyük fiaskosunu "Bakı-2015” I Avropa oyunlarında yaşadı. Yarışlar başlamadan əvvəl iddialı açıqlamalar verən federasiya rəhbəri ondan sonra susmağa üstünlük verdi. Səbəb isə "Bakı-2015″də heç bir uğurun qazanılmaması oldu. Piasport.az-a verilən məlumata görə, millət vəkili "Bakı-2015″dən əvvəl ölkə rəhbərliyinə bir neçə medal qazanacaqları ilə bağlı böyük vədlər verib. Lakin yarışların medal sıralamasında Azərbaycan üzgüçülərinin adı yer almayıb.

2018-ci ildə Xanlar Fətiyevin avtobusu komandanın əlindən alması ilə bağlı məlumatlar yayıldı. Məlumatda qeyd edilmişdi: "“Kəpəz” hələ premyer-liqada mübarizə apardığı dönəmdə günü qara idi. Beş kişinin əlinə baxan klubda zaman-zaman müxtəlif problemlər ortaya çıxırdı. Komanda birinci diviziona yuvarlanandan sonra isə qayğılar bir az da artıb. “Kəpəz”liləri gəzdirən gözəgəlimli avtobus artıq komandaya məxsus deyil. Belə ki, klubun Müşahidə Şurasının üzvü, həm də Gəncə Avtomobil Zavodunun İdarə Heyətinin rəhbəri olan Xanlar Fətiyev zavodun balansında olan nəqliyyat vasitəsinin dayancağa aparılmasına dair göstəriş verib. Odu ki, müasir standartlara cavab verən avtobus artıq xeyli vaxtdı “Kəpəz”lilərdən uzaq düşüb. Futbolçular və məşqçi heyəti oyunlara klubun ixtiyarında olan kiçik tutumlu “Otoyol”la gedib-gəlir".

Hətta yerli mediada (2018-ci ildə) Xanlar Fətiyevin Su İdman Növləri Federasiyasında rəhbər olduğu dövrdə maaşları gecikdirdiyi, milli komadanı isə olmaması ilə bağlı məlumatlar yayılmışdı.

***

Hələ bir neçə il öncə mühacirətdə yaşayan araşdırmaçı-jurnalist Cavanşir Həsənli Xanlar Fətiyevin Avropanın bir sıra ölkələrində qurduğu şirkətlər barəsində sənədləri açıqlayıb.

Hələ o zaman Cavanşir Həsənli Xanlar Fətiyevin biznesi ilə əlaqədar hazırladığı və özünün “Facebook” profilində yerləşdirdiyi materiallara nəzər salaq:

“Parlamentin mandatını daşıyan oliqarx, Azərbaycan-Almaniya parlamentlərarası əlaqələr üzrə işçi qrupunun rəhbəri Xanlar Fətiyev Almaniyada böyük işlər görməkdədir. Adamı zatən ora təyin ediblər ki, Almaniyada ölkəmizlə bağlı iş aparsın, ikitərəfli əlaqələrin inkişafına öz töhfəsini versin. O da əlindən gələni edir. Berlində, Ştutqartda şirkətlər açıb, nə az-nə çox 3 milyon avrodan artıq yatırım edb. Şəkillərini paylaşdığım AZ seriyalı 100 minlik avtomobillərə təkcə Berlində və Ştuttqartda deyil, Münxendə, Hamburqda, Frankfurtda, Drezdendə (aeroport terminalı) rast gələ bilərsiniz.

Bunlar kolleksiya filan deyil, Gəncə Avtomobil Zavodunun rəhbərinə məxsus avtomobillərin icarəsi ilə məşğul olan AZNUR GMBH şirkətinə məxsusdur.

Şirkət 2010-cu il iyunun 15-də Charlottenburg (Berlin) ədliyyəsində nizamnamə kapitalı 25 min avro olmaqla HRB 127288 B saylı şəhadətnamə ilə qeydiyyatdan keçib. Müxtəlif vaxtlarda Sona Osmanova, Murad Süleymanov, Fəxri Həsənov tərəfindən idarə olunub. Berlinin AUGSBURGER STR. 31 ünvanında fəaliyyət göstərən şirkətin hazırki direktoru Elvira Şahbazovadır. Elvira Şahbazova bir müddət həm də Berlində Fətiyevə məxsus, 2006-cı ilin fevralından fəaliyyət göstərən, dövriyyəsi 1 milyon avrodan yuxarı olan BRASIL GASTRO GMBH adlı şirkəti və eyni adlı restoranı idarə edib.

Xanlar Fətiyev bir müddət adıçəkilən restoranı tanıdığını və orada olduğunu etiraf etsə də, “Brasil Brasileiro”nun ona məxsus olduğunu təkzib etmişdi:

“Berlində, Kudamda yerləşir. Çox gözəl restorandır. İstəyərdim, mənim olsun, ancaq o restoran mənim deyil və mənə heç bir aiddiyəti yoxdur”.

Deputatın Almaniyadakı daha bir şirkəti 2010-cu ilin oktyabr ayında Ştuttqart şəhərində AZNUR STUTTGART GMBH adı ilə 25 min avro nizamnamə kapitalı ilə qeydiyyatdan keçib. 2016-cı ilin aprelin 20-də şirkət yenidən Charlottenburg (Berlin) ədliyyəsində HRB 176094 B saylı lisenziya ilə qeydiyyatdan keçirilib və AZNUR TRAVEL GMBH adı ilə Berlində Fətiyevin avtomobillərinin kirayəsi ilə məşğul olan AZNUR GMBH-nin ofisində, AUGSBURGER STR. 31 ünvanında fəaliyyət göstərməyə başlayıb, yeni nizamnaməyə uyğun olaraq turizm xidmətləri göstərir. 2011-ci ili 100 min avro zərərlə başa vuran bu şirkətini hazırda Berlində yaşayan Sona Osmanova idarə edir.

Almaniyanın Lübeck şəhərində, Pinassenweg 26-da isə AZNUR GMBH tərəfindən taksi parkı açılıb.

AZNUR adı altında Fətiyevin Gəncə Avtomobil Zavodundan şaxələnən biznesi Maltaya, İspaniyaya qədər uzanıb. İspaniyanln Ciudad aeroportunda da AZNUR-un kirayə avtomobilləri xidmət göstərir.

Keçək, Belarusiyaya…

Bu ölkədə Fətiyevin iki şirkəti var. Minskdə Xanlar Fətiyevə məxsus AZNUR ZTAA (Замежнае таварыства з абмежаванай адказнасцю “АЗНУР””) şirkəti də avtomobillərin icarəsi ilə məşğuldur. 2010-cu ilin sentyabrın 15-dən fəaliyyətdə olan şirkətin (qeydiyyat nömrəsi: 191431445) ofisi Belarusiya paytaxtının Sovetskaya 2/2 ünvanında yerləşir. Şirkətin bu ünvandakı avtoparkından başqa, Minskin Kirovsk küçəsi 13 ünvanındakı “Crowne Plaza” otelində də xidmət parkı var. Şirkət sürücüsüz və ya sürücülü olmaqla ümumilkdə icarəyə 32 avtomobil təqdim edir. (http://aznur.by/services/…)

Deputatın Belarusiya paytaxtındakı taksi xidməti ilə məşğul olan digər şirkəti AZNUR TAKSİ (Прыватнае ўнітарнае прадпрыемства па аказаннi паслуг “АЗНУР Таксі”) 2015-ci ilin sentyabrın 14-dən fəaliyyətə başlayıb, lakin ötən ilin martında bağlanması üçün rəsmi müraciət olunub.

Moskva və Kiyevdə də şirkətin avtomobillərin icarəsi xidməti göstərən filialları var.

Azərbaycanda AZNUR MMC ilə bağlı isə yazmağa lüzum yoxdur, zatən Binə aeroportundan tutmuş ölkənin bir sıra şəhərlərində Fətiyevin avtoparkları hər kəsə bəllidir.

Amma oliqarx deputat heç də təkcə avtomobil icarəsi, taksi xidməti və turizm sahəsində imperiya qurmayıb. Bakı şəhərində Nərimanov prospekti 205 ünvanındakı “Belaruski” supermarketi də deputata məxsusdur.

Buna qədər Xanlar Fətiyev Tiflisdə eyni ad altında 4 supermarketdən ibarət marketlər şəbəkəsi qurub.

1. Tbilisi, 10 I. Abashidze St.

2. Tbilisi, 34 Ts. Dadiani St, B. 5

3. Tbilisi, 4/2 Gulia Sq.

4. Tbilisi, Gldani, II M/D, 1 Pore Mosulishvili St.

Marketlər Fətiyevin Gürcüstandakı AZNURGEORGIA şirkəti tərəfindən idarə olunur.

AZNUR GEORGİA LLC 2016-cı il mayın 23-də Gürcüstanın Ədliyyə nazirliyində 404513941 saylı şəhadətnamə ilə qeydiyyatdan keçirilib. Qeydiyyat ünvanı Georgia, Tbilisi, Vake-Saburtalo, M.Kostava N 63/68 olaraq qeyd olunub. Şirkətin rəsmi təsisçisi Fətiyevin Azərbaycandakı AZNUR MMC (2002-ci ildən fəaliyyətdədir) şirkətidir.

Azərbaycandakı AZNUR TRADE MMC supermarketlər şəbəkəsi üçün təkcə ötən ilin yanvarında Belarusiyanın Poltava ət kombinatına (Тов Полтавський Мясокомбінат) 19950 kq ət məhsulları sifariş edib.

Bu da hamısı deyil, Fətiyev çox uzaq ölkələrin birində xüsusilə “məşhurdur”. Əməlli-başlı skandal yaradıb.

Bu barədə başqa bir vaxt…”

Göründüyü kimi “susmaq qızıldır” deyib danışmayan Fətiyev cəmi bir neçə il ərzində Avropanı fəth etməyi bacarıb. Bu gün yenidən parlamentə düşmək eşqinə düşən və bunun üçün himayədarlarından dəstək alan Fətiyev görəsən indi hansı qitəni fəth etmək eşqinə düşüb.

Artıq çoxlarına məlumdur ki, Fətiyev kimlərinsə razılığını almaqla işin yarısını həll edə bilib. Qaldı namizədliyi hakim partiya tərəfindən irəli sürüldüyü 98 saylı Bərdə – Tərtər seçki dairəsinin seçicilərinin insafına…

İndi 98 saylı Bərdə – Tərtər seçki dairəsinin seçicilərinin ona səs verəcəyi heç də inandırıcı görünmür.

32gun.az