Bir neçə ay öncə AYNA taksi fəaliyyəti üçün yeni qaydalar, yeni şərtlər tətbiq etdi. Bununla taksi fəaliyyətinin yaxşılaşdırılacağı deyilirdi. Amma bu yaxşılaşma özünü ancaq taksilərin əlçatanlığının azalmasında, qiymətlərin ikiqat bahalaşmasında göstərir. Heç köhnə maşınlar da dövriyyədən çıxmadı. Hazırda taksi dövriyyəsində əksər maşınlar yenə də köhnə “Prius”lardır.

Sürücülər təzə maşınla qeydiyyatdan keçir, amma sifarişə köhnə “Prius”, köhnə “Opel”lərlə gəlirlər.

Avqust ayının əvvəlində AYNA sosial media platformalarında vətəndaş müraciətləri əsasında görülən tədbirlər barədə paylaşım etdi.

Vətəndaşlardan daxil olan müraciətlər əsasında 65 taksi minik avtomobili daşımalardan kənarlaşdırılıb.

Qurum vətəndaşlara müraciətində bildirib:

“Sərnişinlərdən taksi sahəsində qarşılaşdıqları müxtəlif problemlərlə bağlı həm taksi sifarişi operatoruna, həm də AYNA-nın sosial şəbəkə hesabları üzərindən, eləcə də "141" Çağrı Mərkəzinə müraciət etmələri və nəqliyyat vasitəsinin dövlət qeydiyyat nişanı barədə məlumatları təqdim etmələri xahiş olunur.

Sifariş edilən və ünvana gələn taksilərin fərqli olması ilə qarşılaşan vətəndaşlara sifarişdən imtina etmələri, eyni zamanda həm bu halda, həm də taksi sürücülərinin davranışı, kondisionerdən istifadə edilməməsi və s. haqqında AYNA-ya məlumat vermələri xahiş olunur.

Taksi vasitəsilə sərnişindaşımalarda xidmət keyfiyyəti ilə bağlı sərnişinlərdən daxil olan müraciətlər AYNA tərəfindən araşdırılır və taksi sifarişi operatorları ilə proqram təminatının verdiyi üstünlüklərdən istifadə edilərək neqativ halların qarşısının alınması üçün tədbir görülür. Qanunvericiliyin tələblərini yerinə yetirməyən sürücülərin icazələri ləğv ediləcək".

Nəqliyyat eksperti Eldəniz Cəfərov “Yeni Müsavat”a şərhində problemin tam həll olunmamasının əsas səbəbini belə izah edib: “Vaxtilə ictimai nəqliyyat şaxələndirilməyib. Mövcud olan tramvay, trolleybus xətləri sökülüb, bir kənara atılıb. Bu gün ictimai nəqliyyat ancaq avtobus və metrodan ibarətdir. Yük əsas bu iki seqmentə düşüb. Pandemiya dövründə və ondan sonra da taksilərə tələb artdı. Hazırda vətəndaşların daha çox ictimai nəqliyyatdan istifadə etmələrinə baxmayaraq, taksilərə üstünlük verənlər də var. Amma obyektiv yanaşsaq, taksi fəaliyyətinin indiki vəziyyəti iki il öncə olan vəziyyətdən qat-qat yaxşıdır. Əvvəllər xarici taksi şirkətləri bizim ölkəmizə gəlib fəaliyyət göstərirdilər, amma baş verən mübahisələrin həllində özlərini kənara çəkirdilər. Yeni qanunlar ona görə qəbul edildi, yeni qaydalar ona görə tətbiq olunmağa başladı ki, dövlət qurumlarında müvafiq təsir "rıçaqları" yaransın. Məqsəd həmin taksi şirkətlərinə təsir edib taksilərin keyfiyyətli və təhlükəsiz fəaliyyət göstərməsinə nail olmaqdır. Çünki cəmiyyət artıq bəzi taksi şirkətlərindən, sürücülərdən bezmişdi. Doğrudur, bunu hamıya aid etmək olmaz".

Ekspert hesab edir ki, taksi xidmətində keyfiyyət yüksəlməsə də, ən azı təhlükəsizliyə nail olunub: “Mən bu ilin sonuna qədər köhnə taksilərin qalmasının tərəfdarıyam. Düşünürəm ki, bu ilin sonuna kimi taksi sürücülərinə və şirkətlərə özlərini toplamaq üçün möhlət vermək olar. Amma bunu gələn ilə saxlamaq olmaz. Çünki ictimai nəqliyyat mövcud yükü qaldırmaq gücündə deyil. Hesab edirəm ki, vəziyyət yavaş-yavaş tənzimlənir. Biz cəmiyyət olaraq da qurumlarla birgə buna nail ola bilərik. Öncədən də bəlli olduğu kimi, proses qısa müddətdə həll oluna bilməz. Amma yenə də əvvəlkinə nisbətən taksi daha təhlükəsiz olub. Keyfiyyətdə ciddi dəyişiklik olmasa da, mərhələ-mərhələ buna da nail olacağıq. Taksi sürücülərinin əksəriyyəti aztəminatlı vətəndaşlardır. Lakin bu o demək deyil ki, biz bu sahəni nəzarətsiz buraxmalıyıq. Cəmiyyətin ictimai nəqliyyat üzərində daimi nəzarəti olmalıdır. Mən düşünürdüm ki, sentyabrın 15-nə kimi köhnə taksilər yığışdırılacaq, amma taksi xidmətində hələ də köhnə avtomobillər qalmaqdadır. Bununla yanaşı, kobud taksi sürücülərinin sayı xeyli azalıb. Taksiyə artıq bir peşə kimi yanaşılır. Fikrimcə, bu ilin sonuna kimi güzəştlər edib, gələn ilin yanvar ayından etibarən tam keyfiyyətli taksi xidmətini əldə edə bilərik. Təəssüf ki, xarici taksi şirkətləri bəzi qaydaları pozmağa meyllidir. Bu səbəbdən də daim nəzarətə ehtiyac var. Taksi xidmətinin nə zaman yüksək keyfiyyətli səviyyəyə çatacağını demək çətindir. Yeni qanunların hamısını qısa müddətdə sərt şəkildə tətbiq etməyə başlasaq, vətəndaşlar üçün çox çətin olacaq. Proses balanslı aparılmalıdır. Bunu avtobusların, metroda qatarların sayını artıraraq etmək lazımdır. İctimai nəqliyyatda lazımi qədər nəqliyyat vasitələri olduqda, intervallar azaldıqda keyfiyyətsiz taksi xidməti sıradan çıxacaq. Vətəndaşlar keyfiyyətsiz taksidə getməkdənsə, keyfiyyətli ictimai nəqliyyata üstünlük verəcəklər. Bu proses bir qədər zaman tələb edir”.

Nəqliyyat eksperti Rauf Ağamirzəyev isə vətəndaşların mövcud problemlərlə bağlı AYNA-ya müraciət etməsinin tərəfdarıdır: “AYNA aidiyyəti müraciət üzrə araşdırma aparmalı, fakt öz təsdiqini taparsa, daşıyıcını xətdən uzaqlaşdırmalıdır. Əgər sifariş verilən avtomobil gələn avtomobillə eyni deyilsə, xətdən uzaqlaşdırılmalı, icazəsi də ləğv olunmalıdır”.