[center][/center]
Bakıda fəaliyyət göstərən “Tüstü Pub və Restaurant” adlı ictimai iaşə obyektinin vergi qanunlarını pozduğu iddia olunur. Bakunews.az-a vətəndaş müraciəti əsasında müəssisə müştərilərdən ödənişi rəsmi kassa çeki təqdim etmədən, “kartdan karta” (cart-to-cart) üsulu ilə qəbul edir.

Redaksiyamıza daxil olan faktlara əsasən, 10 oktyabr 2025-ci il tarixində vətəndaş tərəfindən 50 manat məbləğində vəsait “Tüstü Pub və Restaurant” adından fəaliyyət göstərən obyektin icarədarı Üzeyir adlı şəxsin şəxsi bank kartına köçürülüb. Ödəniş Unibank kartına köçürülmə vasitəsi ilə həyata keçirilib, əməliyyat uğurlu statusla tamamlanıb.

Müştəri bildirib ki, bu ödəniş qarşılığında ona nə kassa çeki, nə də rəsmi qəbz təqdim olunmayıb. Bu isə Azərbaycan Respublikasının Vergi Məcəlləsi və “Nağdsız hesablaşmalar haqqında” Qanunun tələblərinə açıq şəkildə ziddir.

Vergi Məcəlləsinin 16.1.1 və 50-ci maddələrinə əsasən, ictimai iaşə obyektləri satış zamanı nəzarət-kassa aparatı (NKA) vasitəsilə ödənişləri rəsmiləşdirməlidir.
“Nağdsız hesablaşmalar haqqında” Qanunun 3.1.6-cı maddəsinə əsasən isə kommersiya fəaliyyəti ilə məşğul olan şəxslər nağdsız ödənişləri yalnız hüquqi hesab və ya POS-terminal vasitəsilə qəbul edə bilər.
Fiziki şəxsin şəxsi kartına ödəniş qəbul etmək yalnız şəxsi məqsədlər üçün icazəlidir, kommersiya məqsədilə istifadəsi isə qadağandır.Vergi Məcəlləsinin 58.1.3 maddəsinə görə, kassadan kənar vəsait qəbul edən sahibkarlıq subyekti 10 000 manata qədər cərimə edilə və ya fəaliyyətinin dayandırılması ilə üzləşə bilər.
Ekspertlərin fikrincə, bu kimi hallarda həm vergi orqanları, həm də istehlakçı hüquqlarını qoruyan qurumlar tərəfindən araşdırma aparılmalıdır.
“Tüstü Pub & Restaurant” sosial şəbəkələrdə (Instagram-da “tustupub” adı altında) 80 mindən çox izləyiciyə malikdir və paylaşımlarında Bakı şəhəri, Nəsimi rayonu, 20 Yanvar küçəsi 40 ünvanında fəaliyyət göstərdiyini bildirir.

Redaksiya olaraq bu məsələ ilə bağlı qarşı tərəfin mövqeyni öyrənmək üçün müraciət göndərmişik. Lakin şəxslər məsələ ilə bağlı açıqlama əvəzinə məsələni inkar etməyə üstünlük verdi. Maddi sübutlar isə tam əksini qanuna zidd fəaliyyəti sübüt edir. Yenədə məsələ ilə bağlı hər hansı açıqlama etmək istədikləri halda söz haqları tərəfimizdən təmin ediləcəkdir. Bakunews.az