[center][/center]
Yanvar ayı ənənəvi olaraq icra hakimiyyətlərinin, xüsusən də icra başçılarının illik “hesabat” yığıncaqları ilə yadda qalır. Əgər buna doğrudan da hesabat demək mümkündürsə…

Yenixeber.org: Nərimanov rayonunda 2025-ci ilin sosial-iqtisadi inkişafının yekunlarına dair hesabat yığıncağı keçirilib. Tədbirdə Nərimanov Rayon İcra Hakimiyyətinin başçısı Elgin Həbibullayev, Prezident Administrasiyasının Ərazi-təşkilat məsələləri şöbəsinin 1-ci ərazi sektorunun müdiri Tağı Tağıyev, millət vəkilləri, YAP rayon təşkilatının, bələdiyyənin və digər qurumların rəhbərləri iştirak ediblər. Formal baxımdan hər şey qaydasındadır, zal doludur, videoçarx nümayiş olunur, çıxışlar edilir və sairə.

Elgin Həbibullayev məruzəsində Prezident İlham Əliyevin rəhbərliyi ilə 2025-ci ilin ölkə üçün “inkişaf və tərəqqi ili” olduğunu, dövlət başçısının həyata keçirdiyi siyasət nəticəsində sabitliyin və təhlükəsizliyin təmin edildiyini bildirir. Bu fikirlərlə razılaşmamaq mümkün deyil. Prezident İlham Əliyevin həyata keçirdiyi dövlət siyasəti, ölkə miqyasında icra olunan layihələr və strateji islahatlar göz önündədir. Bunu xalq bilir, görür və qiymətlənidirir... Bəs siz, Elgin Həbibullayev, 2025-ci ildə Nərimanov rayonu üçün nə etmisiz?

Problem də elə burdadır.

Prezidentin gördüyü işləri cəmiyyət bilir. Cəmiyyətin bilmədiyi və bilmək istədiyi icra başçılarının, konkret halda Elgin Həbibullayevin rəhbərlik etdiyi Nərimanov rayonunda bir il ərzində hansı real işlərin görüldüyüdür.

Hesabat yığıncağında nə qədər vəsaitin ayrıldığı, bu vəsaitlərin hansı tenderlərə xərcləndiyi, hansı şirkətlərin qalib gəldiyi, görülən işlərin dəyəri və nəticəsi barədə bir dənə də olsun konkret rəqəm açıqlanmayıb. Ümumi sözlərlə, şablon ifadələrlə hesabat olmur. Hesabat maliyyə şəffaflığı, dəqiq statistika və ictimai məsuliyyətdir.

Əgər hər şey qaydasındadırsa, əgər görülən işlər doğrudan da əhalinin rifahına xidmət edirsə, o zaman rəqəmləri açıqlamaqdan niyə çəkinilir? Nərimanov rayonunda ayrılan milyonlarla vəsaitin fonunda görülən işlərin nəticəsi niyə gözlə görünmür?

Diqqətçəkən məqamlardan biri də odur ki, hesabat yığıncağında iştirak edən Prezident Administrasiyasının nümayəndəsi Tağı Tağıyev də icra başçılarından konkretlik tələb etmir. O da çıxışında Prezident İlham Əliyevin siyasətindən, strateji hədəflərdən danışır. Halbuki bu cür tədbirlərdə əsas diqqət yerli icra strukturlarının fəaliyyəti üzərində olmalıdır.
Nərimanov rayonu bu gün bir çox sosial və infrastruktur problemləri ilə üz-üzədir. Bu fonda icra başçısının dediyi “inkişaf” və “tərəqqi” ifadələri sadəcə kağız üzərində qalır. İllik hesabat isə tərif və təşəkkür yeri deyil, hesab vermək üçündür.

Beləliklə, Bizimesr.az sualı açıq saxlayır - Nərimanov rayonuna ayrılan vəsaitlər hara xərclənib və niyə bu barədə ictimaiyyətə açıq, rəqəmlərlə danışılmır?(bizimesr.az)