[center][/center]
Daxil olan məlumata görə, “Qurtuluş 93” yaşayış kompleksi ərazisində növbəti qanunsuz tikinti işlərinə start verilib. İddialara əsasən, yaşayış üçün nəzərdə tutulmuş birinci mərtəbə mənzilləri sökülərək və ya yenidən qurularaq obyekt kimi inşa olunur.Sakinlərin sözlərinə görə, söhbət ilkin layihədə yaşayış sahəsi kimi təsdiqlənmiş mənzillərin kommersiya təyinatlı obyektə çevrilməsindən gedir. Bu isə həm şəhərsalma normalarına, həm də digər sakinlərin hüquqlarına zidd hesab olunur.Kompleksdə yaşayan bəzi sakinlər bildirirlər ki, son günlər tikinti briqadası tərəfindən birinci mərtəbədə divarların sökülməsi və yenidən qurulması işləri aparılır. Onların iddiasına görə, həmin sahələr gələcəkdə mağaza və ya digər kommersiya obyekti kimi fəaliyyət göstərəcək.Sakinlər narahatdır ki, binanın daşıyıcı konstruksiyalarına müdaxilə edilə bilər, səs-küy və əlavə insan axını yaşayış şəraitini çətinləşdirə bilər, yanğın və təhlükəsizlik qaydaları pozula bilər, həmçinin ümumi istifadə sahələri zəbt edilə bilər.Məlumatda o da bildirilir ki, tikinti aparılan sahənin kompleksin JEK müdirinə məxsus olduğu iddia olunur. Sakinlər hesab edir ki, məhz bu səbəbdən aparılan işlərə nəzarət mexanizmləri işə düşmür və qanunsuzluqlara göz yumulur. İddialara görə, kompleks rəhbərliyi prosesdən xəbərdardır və tikintinin qarşısının alınması üçün hər hansı addım atmır. Bu isə yerli idarəetmə strukturlarının obyektivliyi ilə bağlı suallar yaradır.Məsələ ilə bağlı aidiyyəti qurumların mövqeyini öyrənmək məqsədilə sorğu ünvanlanacağı bildirilir. Əgər doğrudan da yaşayış təyinatlı sahə qanunsuz şəkildə obyektə çevrilirsə, bu halda müvafiq icazələrin olub-olmaması, layihə dəyişikliyinin təsdiqi və tikintiyə nəzarət məsələləri araşdırılmalıdır.Qeyd edək ki, qüvvədə olan qanunvericiliyə əsasən, yaşayış sahələrinin təyinatının dəyişdirilməsi üçün müvafiq icra hakimiyyəti orqanlarının razılığı və rəsmi sənədləşmə tələb olunur.

Məsələ diqqətdə saxlayacaq və qarşı tərəfin mövqeyini dərc etməyə hazırdır. AzTimes.az