Bu yaxınlarda aktualxeber.az saytında “AZAL-ın “VİP” xidmətləri naşükürlər əlində” başlıqlı məqalə dərc etmişdik. Məqalə geniş oxucu kütləsi üçün maraq kəsb etdiyindən redaksiyamıza daxil olmuş yeni məlumatları da əlavə etmək qərarına gəldik. Xatırladaq ki, Azərbaycanın hava nəqliyyatında monopolist şirkət olan AZAL-ın 27 ilə yaxın prezidenti olmuş Cahangir Əsgərov bir neçə gün əvvəl vəzifəsindən azad edildi. Hərçənd, onun gedişi ilə nəyinsə dəyişəcəyinin, məsələn, ən vacib məsələ olan aviabiletlərin qiymətinin ucuzlaşmasının heç üfüqləri belə görünmür. Ancaq məqaləmizin mövzusu, qayəsi bu deyil. Məsələ burasındadır ki, Cahangir Əsgərovun rəhbərliyi dönəmində AZAL-da xərçəng xəstəliyi kimi kök salmış problemlər, mühüm vəzifələri zəbt etmiş bəzi destruktiv ünsürlər hələ də qalmaqda, olsa-olsa, korrupsiya estafetini öz bioloji varislərinə, yaxın-uzaq qohumlarına ötürməkdədirlər.
2011-ci ildə yaranmaqla dərhal inhisarçıya çevrilən “VIP Aviasiya Xidmətləri Şirkəti” MMC-nin 20 ildən artıq rəhbəri olmuş İlham Sabir oğlu Şükürov iki onillik ərzində şirkətin pullarını xaricə daşıyıb. Təkcə korrupsiya və maxinasiyalardan qazanmayıb, həm də Heydər Əliyev Beynəlxalq Aeroportunun Terminal-1 və Biznes Aviasiya terminalında, eləcə də «Bakı» və «Azərbaycan» VİP zallarında saat və zərgərlik məmulatları təklif edən çoxsaylı satış məntəqələri olub. Topladığı haram kapitalla dünyanın ən zəngin şəhəri olan Dubayda mənzil alqı-satqısı, villaların kirayəyə verilməsi üzrə biznes qurub. Eyni biznesi Bakıda məşhur “milyonerlər məhəlləsi” kimi ad çıxarmış Teymur Əliyev küçəsində də qurubdu. Ölkədən Almaniyaya müalicə almaq adı ilə çıxıb, hazırda Avropanın ən komfortlu kurort guşəsi olan Karlovı Varı şəhərində dincəlir.
Hələ 10 il əvvəl İlham Şükürov şirkətdə öz millətimizdən olan cavan və təcrübəli qızları işdən uzaqlaşdıraraq onların yerinə Rusiyadan, Ukraynadan qızlar dəvət edəndə və özümüzünkülərdən 5 dəfə artıq əməkhaqqı verəndə heç də əsassız olmayan söz gəzirdi ki, həmin “importnı” qızlar həm də başqa təyinatla istismar olunurlar (Necə ki, katibələr müdirlərə həm də çay dəmləyirlər). İlham Şükürovun AZAL-ı nümayəndə kimi təmsil etdiyi Türkiyədən Dubaya necə qaçması və başqa macəraları barədə tənqidi məqalələr dərc edən kütləvi informasiya vasitələri o vaxt ortaya belə suallar qoyurdular: – Birincisi, əcnəbi qızlar görəsən İlham Şükürova hansı xidməti göstərir ki, Azərbaycan vətəndaşı olan xanımlar o qulluğu göstərə bilmir?; – İkincisi, bütün normal ölkələrdə üstünlük yerli vətəndaşlara verildiyi halda, İlham Şükürovun əcnəbi qızlara olan sevgisinin, məhəbbətinin, qayğısının kökündə nə dayanır?; – Üçüncüsü, əcnəbi-miqarantların işə götürülməsi üçün qanuna görə hər bir müəssisə dövlət büdcəsinə xeyli miqdarda pul ödəyir. Görəsən, bu boyda pulun xərclənməsində İlham Şükürovun marağı nədir? Bu suallara cavab tapılmamış İlham Şükürov təsisçisi olduğu şirkətə oğlu Sabir Şükürovu baş direktor təyin etdirməklə yeni suallar yaratdı. İndi ata Şükürovun əyri yolunu, naşükürlər dinastiyasını oğul Şükürov davam etdirir. Hərçənd, oğul Şükürovun da özünəməxsus zərərli vərdişləri var. Sabir Şükürovun qumara qarşı çox həssas olduğu, həm də uduzmağa meylli olduğu bildirilir. Bu isə yaxşı heç nə vəd etmir.
Bir maraqlı məqama da toxunaq ki, aktualxeber.az-a daxil olan yeni məlumatlara görə AZAL-ın 27 ilə yaxın prezidenti olmuş Cahangir Əsgərov “VIP Aviasiya Xidmətləri Şirkəti” MMC-nin əsas sahibidir və İlham Şükürov orada sadəcə 20 % paya sahibdir. Elə bu pay bölgüsünə görə də C.Əsgərov ona hər yerdə yaşıl işıq yandırıbdı. Bunlar əlbir olub dövlətin milyonlarla vəsaitini mənimsəyərək özlərinə sərf ediblər. Ümidvarıq ki, tezliklə əlaqədar orqanlar AZAL-da yoxlamalar apararaq günahkarları cəzalandıracaqdır.
Mövzuya qayıdacağıq və yazıda adları keçən şəxsləri də dinləməyə hazırıq.