UNİBANK-ın Müşahidə Şurasının sədri Fransadakı ultralüks villasını satışa çıxarıb - İddia
[center]
[/center]
[/center]Xaricdə yaşayan azərbaycanlı bloger Cavanşir Həsənli UNİBANK-ın Müşahidə Şurasının sədri Eldar Qəribovun Fransanın cənubunda yerləşən ultralüks villası ilə bağlı diqqətçəkən məlumat paylaşıb.
Blogerin yazdığına görə, Fransanın Nitsa şəhəri yaxınlığındakı əsrarəngiz Villefranche-sur-Mer bölgəsində yerləşən və “Villa Floriana” adı ilə tanınan bu mülk satışa çıxarılıb. Bildirilir ki, Malta vətəndaşlığı da olan azərbaycanlı bankir Fransa–Azərbaycan münasibətlərində ötən il pik həddə çatan gərginlik səngidikdən sonra sevimli villasını satmaq qərarı verib.
Cavanşir Həsənlinin paylaşımında qeyd olunur ki, villanın satış qiyməti 17 milyon avrodur.
Mülk 1261 Av. Léopold II, 06230 Villefranche-sur-Mer ünvanında yerləşir və Fransanın, Birləşmiş Ərəb Əmirliklərinin, Almaniyanın və Rusiyanın lüks daşınmaz əmlak şirkətləri vasitəsilə satışa təklif olunur.
Məlumata əsasən, “Villa Floriana” Art Deco memarlıq üslubunda inşa edilib, tam yenilənib və Cap Ferrat yarımadasına yuxarıdan baxan olduqca prestijli mövqedə yerləşir. Bu tip villalar bölgədə ən bahalı və nadir əmlaklar sırasında yer alır. Tikili 1920–1930-cu illərin klassik və nüfuzlu memarlıq üslubunu özündə birləşdirir.
Villa təpə üzərində yerləşdiyindən 360 dərəcəlik panoramik mənzərəyə malikdir. Buradan həm gün doğumu, həm də gün batımı, eləcə də liman və açıq dəniz mənzərəsi izlənilir.
Blogerin yazdığına görə, mülkün 2 600 kvadratmetr torpaq sahəsi var və ərazi tamamilə yaşıllıqla əhatə olunub. Villanın hovuzu vizual olaraq dənizlə birləşən “sonsuzluq hovuzu” tipindədir ki, bu da lüks villalar üçün ən çox arzulanan xüsusiyyətlərdən sayılır.
Ərazidə 6 avtomobil üçün örtülü parkinq mövcuddur.
“Villa Floriana” dəniz mənzərəsinə açılan 4 yataq otağı olan 320 kvadratmetrlik əsas yaşayış binasından, xidmətçi heyəti üçün nəzərdə tutulmuş ayrıca evdən, həmçinin 160 kvadratmetr sahəsi olan qonaq evindən ibarətdir.
Qeyd edək ki, məlumatlar xaricdə yaşayan bloger Cavanşir Həsənlinin şəxsi paylaşımına istinadən təqdim olunur.
Azadmedia
[center]
[/center]
