[center][/center]
Şirəliyev Kamran Tacəddin oğlu həyat yoldaşının ölümündə həkim səhlənkarlığı olduğunu iddia edir.

Onun sözlərinə görə, 28 noyabr 2025-ci il tarixində həyat yoldaşı Şirəliyev Arzu Azərbaycan Tibb Universitetinin Cərrahiyə Klinikasında çanaq nahiyəsindəki kistanın götürülməsi məqsədilə aparılan əməliyyatdan sonra dünyasını dəyişib. Şikayətçi bildirir ki, əməliyyat zamanı yol verilən ciddi tibbi səhvlər sonradan gizlədilib.

Kamran Şirəliyevin iddiasına əsasən, həyat yoldaşı əməliyyat günü faktiki olaraq həyatını itirib. Lakin bu fakt ailədən gizlədilərək vəziyyət “koma” adı altında təqdim olunub və mərhum 18 gün xəstəxanada saxlanılıb. Şikayətçi hesab edir ki, bu müddət ailəni sakitləşdirmək və baş verənləri ört-basdır etmək məqsədi daşıyıb.

Vətəndaş bildirir ki, əməliyyatda kafedra müdiri Fariz Camalov Hidayət oğlu və ikinci cərrah kimi Fərhad Sultanov iştirak edib. Onun sözlərinə görə, əməliyyatdan iki saat sonra Fərhad Sultanov onu otağına çağıraraq əməliyyatın “həddindən artıq uğurlu keçdiyini” bildirib.

Eyni zamanda şikayətçi qeyd edir ki, paralel olaraq Fariz Camalovun assistenti Nərgiz adlı tibb işçisinə zəng edilərək xəstənin ayaq barmaqlarında reaksiya olub-olmadığının yoxlanılması tapşırılıb. Bu zəngdən qısa müddət sonra isə xəstənin vəziyyətinin kritik olduğu məlum olub.

Kamran Şirəliyev bildirir ki, həyat yoldaşının ölümü əməliyyat zamanı tətbiq olunan tibbi müdaxilə ilə bağlıdır. Onun sözlərinə görə, belin boşluq hissəsinə vurulmalı olan iynə ürək nahiyəsinə vurulub. Şikayətçi qeyd edir ki, ailə üzvlərindən biri mərhumun yanına daxil olarkən iynənin bel nahiyəsində deyil, məhz ürək nahiyəsində olduğunu müşahidə edib və bunu şəkil çəkərək sənədləşdirib. Buna baxmayaraq, bu tibbi müdaxiləni kimin etdiyi və hansı əsasla aparıldığı bu günə qədər rəsmi şəkildə açıqlanmayıb. Şikayətçinin iddiasına görə, həyat yoldaşı vəfat etdikdən sonra kafedra müdiri Fariz Camalov onunla söhbət zamanı açıq şəkildə məsuliyyəti inkar edən və cəmiyyət üçün ciddi narahatlıq doğuran ifadələr işlədib. Kamran Şirəliyev bildirir ki, Fariz Camalov ona belə deyib:

“Sən mənə heç nə edə bilmərsən. Kağıza nə yazsam, o da olacaq. Mən çox əməliyyatlar etmişəm, ölənlər olub. O qədər adam olub ki, deyib buranı bomba qoyub partladacam, amma görürsən, 14 mərtəbənin hamısı yerindədir, heç yer partlamayıb”.

Vətəndaş hesab edir ki, bu cür ifadələr təkcə ailəyə qarşı hörmətsizlik deyil, həm də tibb sistemində cəzasızlıq mühitinin açıq göstəricisidir./Patrul/